ریاض: سعودی ٹورازم اتھارٹی نے مزید 6 ممالک کے شہریوں کے لیے سیاحتی وزٹ ویزے کی سہولت فراہم کردی، جس کے بعد سعودی عرب کے سیاحتی وزٹ ویزے آن لائن حاصل کرنے والے ممالک کی تعداد 63 ہوگئی۔
العربیہ نیوز کے مطابق سعودی ٹورازم اتھارٹی نے اپنے ایک بیان میں بتایا ہے کہ ترکیہ، تھائی لینڈ، پانامہ، سینٹ کٹس اینڈ نیوس، سیشلز اور ماریشس کے شہری بھی آن لائن سیاحتی وزٹ ویزہ حاصل کرسکیں گے، ویزہ ہولڈر ’روح السعودیہ پورٹل‘ سے اہم معلومات، پیکیج اور مملکت کے تمام علاقوں کے حوالے سے سیاحتی پروگرام معلوم کرسکیں گے۔
بتایا جارہا ہے کہ سعودی عرب نے سیاحتی وزٹ ویزے کا اجراء پہلی بار ستمبر 2019ء میں کیا تھا اس پر سیاحت کے علاوہ عمرہ اور مملکت میں ہونے والی کانفرنس، نمائش اور پروگرام میں بھی شرکت کی جاسکتی ہے، 2019ء سے اب تک لاکھوں افراد وزٹ ویزے حاصل کرچکے ہیں۔
یاد رہے کہ حال ہی میں سعودی عرب نے اور بھی کئی قسم کے ویزے متعارف کرائے ہیں، جن میں ٹرانزٹ ویزہ بھی ہے جس پر 96 گھنٹے تک سعودی عرب میں قیام کیا جاسکتا ہے، یہ ویزہ السعودیہ یا فلائی ناس ایئرلائنز سے سفر کرنے پر حاصل کیا جاسکتا ہے، ٹرانزٹ ویزہ سعودی عرب آمد سے قبل حاصل کرنا ہوگا۔
اس کے علاوہ سعودی عرب نے رشتہ داروں اور دوست احباب سے ملاقات کا ویزہ بھی متعارف کرایا ہے، اس کے تحت مقامی شہریوں اور مقیم غیرملکیوں کو اپنے رشتہ داروں اور دوست احباب کوعمرہ کے لیے بلانے کی بھی اجازت دی گئی ہے۔
