جہلم: ڈپٹی کمشنر جہلم میثم عباس کا صبح سویرے شہر کا دورہ، تجاوزات آپریشن کا معائنہ اور نالوں کی فوری صفائی کے احکامات جاری کر دیے۔
تفصیلات کے مطابق ڈپٹی کمشنر نے شاندار چوک اور سول لائن کا دورہ کیا اور گزشتہ رات کیے گئے تجاوزات کے خلاف آپریشن کا جائزہ لیا۔ اس موقع پر میونسپل کمیٹی کے افسران نے انہیں آپریشن کی تفصیلات سے آگاہ کیا۔
ڈپٹی کمشنر نے ہدایات دیتے ہوئے کہا کہ شہر کو تجاوزات سے مکمل پاک کرنے اور خوبصورت بنانے کے لیے تمام ممکنہ اقدامات کیے جا رہے ہیں۔ انہوں نے واضح کیا کہ جو تاجر ابھی تک اپنی غیر قانونی تجاوزات ختم نہیں کر سکے، وہ فوری طور پر رضاکارانہ طور پر ہٹا دیں، بصورت دیگر سخت کارروائی عمل میں لائی جائے گی اور کسی کو کوئی رعایت نہیں دی جائے گی۔
اس کے ساتھ ساتھ ڈپٹی کمشنر نے شہر کے مرکزی نالوں کی صفائی کے عمل کو فوری مکمل کرنے کی ہدایت کی تاکہ نکاسی آب کا نظام بہتر ہو سکے اور عوام کو کسی قسم کی پریشانی کا سامنا نہ کرنا پڑے۔ انہوں نے متعلقہ حکام کو تاکید کی کہ صفائی اور تجاوزات کے خلاف مہم کو موثر انداز میں جاری رکھا جائے تاکہ شہر کے عوام کو صاف ستھرا اور بہتر ماحول فراہم کیا جا سکے۔
