خودکشی، حادثہ یا قتل؟؛ دینہ میں ماں، بیٹے اور بیٹی کی پراسرار موت

دینہ کے نواحی علاقے میں ماں، بیٹی اور بیٹے کی لاشیں ان کے بستروں سے پراسرار حالات میں برآمد ہوئی ہیں۔

جہلم کی تحصیل دینہ کے نواحی علاقے آڑا بڈھار (خورد) میں افسوسناک واقعہ پیش آیا، جہاں ایک ہی خاندان کے تین افراد کی پراسرار موت نے علاقے کو سوگوار کر دیا۔ زہریلی چیز کھانے کے باعث 32 سالہ ہاجرہ بی بی زوجہ سہیل محمود، 7 سالہ قاسم اور 5 سالہ زینب جاں بحق ہو گئے۔

گھر کے سربراہ سہیل محمود کا بھائی ناظم ولد ظفر جو ساتھ ہی رہائش پذیر ہے صبح سویرے اپنے بھائی کے بچوں کو اسکول وین تک چھوڑنے کے لیے جگانے گیا۔ گھر کے باہر تالا لگا دیکھ کر اس نے دیوار پھلانگ کر اندر داخلہ کیا اور ڈرائنگ روم کا دروازہ توڑ کر اندر گیا تو منظر نہایت دل خراش تھا، تینوں ماں اور بچے مردہ حالت میں پڑے تھے اور ان کے منہ سے جھاگ نکل رہی تھی۔

اطلاع ملتے ہی تھانہ منگلا کینٹ پولیس کی بھاری نفری اور ڈی ایس پی صدر سرکل چوہدری شہباز ہنجرا موقع پر پہنچ گئے جبکہ ریسکیو 1122 نے لاشوں کو ڈسٹرکٹ ہیڈ کوارٹر ہسپتال جہلم منتقل کر دیا۔

پولیس کا کہنا ہے کہ یہ معاملہ خودکشی ہے یا حادثاتی موت، اس حوالے سے تفتیش جاری ہے۔ جائے وقوعہ سے شواہد اکٹھے کر لیے گئے ہیں جبکہ اصل حقائق پوسٹ مارٹم رپورٹ اور مزید تحقیقات کے بعد ہی سامنے آئیں گے۔

تحقیقاتی ٹیم کے رکن اسسٹنٹ سب انسپکٹر (اے ایس آئی) جمیل نے میڈیا کو بتایا کہ خاندان کے سربراہ سہیل محمود سے اب تک پولیس کا کوئی رابطہ نہیں ہوسکا اور اس کا موبائل فون بھی بند ہے۔

ایس ایچ او مدثر عباس نے کہا کہ بظاہر اموات کی وجہ زہر خورانی لگتی ہے، تاہم اس افسوس ناک واقعے کے تمام پہلوؤں کی جانچ کی جائے گی تاکہ شواہد اور پوسٹ مارٹم رپورٹ کی روشنی میں اصل وجہ یا محرک سامنے لایا جا سکے۔

اس افسوسناک واقعے کے بعد پورے علاقے میں خوف اور غم کی فضا پھیل گئی ہے جبکہ اہل علاقہ نے واقعے کی شفاف تحقیقات اور اصل حقائق عوام کے سامنے لانے کا مطالبہ کیا ہے۔