جہلم پریس کلب کی عمارت میں 10 کلوواٹ کا جدید سولر سسٹم کامیابی سے نصب کر کے باقاعدہ فعال کر دیا گیا۔ پریس کلب کے عہدیداران اور اراکین نے اس اقدام کو ادارے کے لیے ایک اہم سنگِ میل اور خوش آئند پیش رفت قرار دیتے ہوئے امید ظاہر کی ہے کہ اس سے پریس کلب کی کارکردگی میں مزید بہتری آئے گی۔
تفصیلات کے مطابق ضلع کچہری کے قریب قائم جہلم پریس کلب کی عمارت میں 10 کلوواٹ سولر سسٹم کی تنصیب مکمل ہونے کے بعد اسے باضابطہ طور پر فعال کر دیا گیا۔ اس موقع پر پریس کلب میں صدر مہر محمد الیاس کی زیرِ صدارت ایک دعائیہ تقریب کا انعقاد کیا گیا، جس میں ادارے کی ترقی، صحافی برادری کے اتحاد، پاکستان کی سلامتی، استحکام اور خوشحالی کے لیے خصوصی دعائیں کی گئیں۔
تقریب میں صدر الیکٹرانک میڈیا عامر کیانی، صدر ڈسٹرکٹ یونین آف جرنلسٹس چوہدری مہربان حسین، سابق جنرل سیکرٹری مرزا قدیر بیگ، سابق جنرل سیکرٹری سید مستفیض اقبال بخاری، چیئرمین جہلم پریس کلب چوہدری عابد محمود، جنرل سیکرٹری الیکٹرانک میڈیا غلام قادر مخلص، شہریار علی راجہ، چوہدری تصور حسین، مرزا فاران بیگ، چوہدری دانیال عابد، معروف سینئر صحافی مرزا جبار بیگ، ڈیجیٹل میڈیا کے سرپرست چوہدری سعید ایوب سمیت صحافی برادری کی بڑی تعداد نے شرکت کی۔
شرکاء نے سولر سسٹم کی تنصیب کو بجلی کے بڑھتے ہوئے اخراجات میں کمی، توانائی کے متبادل ذرائع کے فروغ اور پریس کلب کی بلا تعطل فعالیت کے لیے ایک اہم اقدام قرار دیا۔ انہوں نے کہا کہ اس منصوبے سے نہ صرف ادارے کے مالی اخراجات میں نمایاں کمی آئے گی بلکہ صحافیوں کو بھی جدید اور بہتر سہولیات میسر آئیں گی۔
تقریب کے شرکاء نے اس امید کا اظہار کیا کہ مستقبل میں بھی جہلم پریس کلب کی بہتری، جدید سہولیات کی فراہمی اور صحافی برادری کی فلاح و بہبود کے لیے ایسے مثبت اقدامات کا سلسلہ جاری رہے گا۔
