جہلم: حکومت پنجاب کی جانب سے معذور افراد کی بحالی اور فلاح و بہبود کے لیے عملی اقدامات جاری ہیں۔ جسمانی معذوری کا شکار شہریوں کو ضروری آلات اور سہولیات فراہم کرنے کے لیے محکمہ سوشل ویلفیئر بھرپور انداز میں سرگرم عمل ہے۔
اس حوالے سے ایڈیشنل ڈپٹی کمشنر جنرل جہلم صباء سحر نے ڈسٹرکٹ ریہیبلیٹیشن اینڈ ویلفیئر یونٹ کے اجلاس کی صدارت کی، جس میں معذور افراد کی فلاح کے لیے اہم فیصلے کیے گئے۔
اجلاس کے دوران ضلع بھر سے موصول ہونے والی 39 درخواستوں کی منظوری دی گئی، جن میں مالی امداد، مصنوعی اعضاء، ویل چیئرز، سننے والے آلات، سفید چھڑیاں اور دیگر ضروری اشیاء کی فراہمی شامل ہے۔
ایڈیشنل ڈپٹی کمشنر صبا سحر نے اجلاس سے خطاب کرتے ہوئے کہا کہ حکومت پنجاب معذور افراد کو معاشرے کا باوقار اور خودمختار فرد بنانے کے لیے مسلسل اقدامات کر رہی ہے، اور ان کی بحالی کے عمل کو مزید بہتر بنانے کے لیے تمام دستیاب وسائل بروئے کار لائے جا رہے ہیں۔
اجلاس میں موجود سوشل ویلفیئر افسر نے بتایا کہ ضلع جہلم میں اس وقت 67 نئی درخواستیں بھی موصول ہو چکی ہیں، جن پر تیزی سے کام جاری ہے۔ ان کا کہنا تھا کہ حکومت پنجاب کی منظوری کے بعد ان تمام مستحق افراد کو مطلوبہ آلات فراہم کیے جائیں گے، تاکہ وہ اپنی زندگی کو آسان اور باوقار طریقے سے گزار سکیں۔
ایڈیشنل ڈپٹی کمشنر نے ہدایت کی کہ منظور شدہ 39 درخواستوں پر فوری طور پر عملدرآمد شروع کیا جائے تاکہ معذور شہری بروقت امداد حاصل کر سکیں۔ اس موقع پر انہوں نے کہا کہ معذور افراد کی خدمت صرف حکومتی فریضہ نہیں بلکہ معاشرے کے ہر فرد کی ذمہ داری ہے۔
