دینہ: شہید کانسٹیبل محمد سعید کی گیارھویں برسی کے موقع پر ایک پروقار تقریب کا انعقاد کیا گیا، جس میں پولیس افسران اور اہلکاروں نے شہید کی لحد پر حاضری دی، پھولوں کی چادر چڑھائی، فاتحہ خوانی کی اور شہید کو سلامی پیش کی۔
ڈسٹرکٹ پولیس آفیسر (ڈی پی او) جہلم طارق عزیز سندھو کی ہدایت پر ڈی ایس پی صدر سرکل شہباز ہنجرا، ایس ایچ او تھانہ منگلا کینٹ اور دیگر پولیس افسران نے شہید کی قبر پر حاضری دی اور شہید کی بلندیٔ درجات کے لیے خصوصی دعا کی۔
یاد رہے کہ کانسٹیبل محمد سعید ایلیٹ فورس سے وابستہ تھے اور سال 2014 میں احمد آباد بند کے قریب خطرناک ملزمان کی گرفتاری کے دوران موٹر سائیکل سوار دو ملزمان کی فائرنگ کا نشانہ بنے۔ چھاتی پر گولی لگنے کے باعث وہ موقع پر ہی شہید ہو گئے تھے۔
اس موقع پر ڈی پی او جہلم طارق عزیز سندھو نے کہا کہ "شہداء پولیس ہمارا قیمتی اثاثہ ہیں، جنہوں نے اپنی جانوں کا نذرانہ دے کر ملک و ملت کے باغیچے کی آبیاری کی۔”
انہوں نے مزید کہا کہ "شہداء کی قربانیاں ہمارے لیے قرض ہیں، ان کی فیملیز ہماری ذمہ داری ہیں اور انہیں کبھی تنہا نہیں چھوڑا جائے گا۔ شہداء محکمہ پولیس کا حصہ تھے، ہیں اور ہمیشہ رہیں گے۔”
تقریب کے دوران شہید کی خدمات اور قربانیوں کو خراج تحسین پیش کیا گیا اور ان کی قربانی کو ہمیشہ یاد رکھنے کے عزم کا اعادہ کیا گیا۔
