جہلم: حافظ عبدالحمید عامر نے کہا کہ دینی پروگرام اصلاح معاشرہ میں تعمیری کردار ادا کرتے ہیں۔
جامعہ علوم اثریہ جہلم کے مہتمم اور مرکزی جمعیت اہل حدیث پاکستان کے نائب امیر حافظ عبدالحمید عامر نے جامع مسجد ابوبکر صدیق ڈھوک جمعہ میں منعقدہ شافع محشر کانفرنس میں صدارتی کلمات کہتے ہوئے کہا کہ دینی حوالے سے تربیت اور شرعی احکام سیکھنے کے لیے مساجد میں منعقد ہونے والے پروگرام انتہائی اہمیت کے حامل ہیں۔ ان پروگراموں میں شرکت سے مسلمان اپنے ایمان کو تازگی بخشتے ہیں، لہٰذا عوام کو ان میں بھرپور شرکت کرنی چاہیے۔
پروگرام سے خطاب کرتے ہوئے پروفیسر ابوبکر صدیق نے کہا کہ شافع محشر کی محبت اور ان کی اداؤں پر مر مٹنے والا شخص قیامت کے روز شفاعت کا حقدار ہوگا۔ محض باتوں یا نعرہ بازی سے محبت و اتباع کا حق ادا نہیں ہوتا۔ میدانِ محشر میں جو شخص اتباعِ رسول ﷺ میں آگے ہوگا، وہی شفاعت النبی میں بھی سبقت لے جائے گا۔
انہوں نے مزید کہا کہ آج کے نوجوان اگر دنیاوی کامیابی چاہتے ہیں تو انہیں مدینے والے کی شاہراہ کا مسافر بننا چاہیے، نہ کہ دوسری بے منزل راہوں پر دھکے کھائیں۔
مولانا الیاس مدنی آف ساہیوال نے اپنے خطاب میں کہا کہ اگر ہم خود اور اپنی نسلوں کے دلوں میں دین کی محبت پیدا کرنا چاہتے ہیں تو ہمیں سیرت النبی ﷺ کے مطالعہ کو اپنی زندگی کا حصہ بنانا ہوگا۔ اس سے ہماری آنے والی نسلیں اپنے درست آئیڈیل تلاش کر سکیں گی۔
انہوں نے کہا کہ یہ سوچنے کی بات ہے کہ ہم اپنے رہبر و رہنما کی زندگی کے پہلوؤں سے کس قدر واقف ہیں اور ان کے جاں نثاروں کو کس حد تک جانتے ہیں۔ تاریخ اسلام کے زریں دور کو معاشرے میں دوبارہ زندہ کرنا وقت کی اہم ضرورت ہے۔
کانفرنس میں مرکزی جمعیت اہل حدیث ضلع جہلم کے ناظم تبلیغ مولانا قطب شاہ سمیت دیگر مقامی علما نے شرکت کی۔ پروگرام میں اہل محلہ اور شہر کے مختلف مقامات سے کثیر تعداد میں لوگوں نے شرکت کی اور اس کے اصلاحی و تربیتی انداز کو سراہا۔
حاضرین نے مستقبل میں بھی ایسے پروگراموں کے انعقاد کی خواہش کا اظہار کیا۔
