دینہ: ڈپٹی کمشنر جہلم میر رضا اوزگن نے اسسٹنٹ کمشنر دینہ تیمور خان کے ہمراہ پرائمری ہیلتھ سنٹر دینہ کا دورہ کیا اور مریضوں کو فراہم کی جانے والی طبی سہولیات، ادویات کی دستیابی اور ہسپتال کے انتظامات کا تفصیلی جائزہ لیا۔
دورے کے موقع پر اسسٹنٹ کمشنر دینہ نے ڈپٹی کمشنر کو پرائمری ہیلتھ سنٹر کی مجموعی کارکردگی، او پی ڈی کی صورتحال، طبی سہولیات اور ادویات کی فراہمی کے حوالے سے تفصیلی بریفنگ دی۔
اس موقع پر گفتگو کرتے ہوئے ڈپٹی کمشنر میر رضا اوزگن نے ہدایت کی کہ پرائمری ہیلتھ سنٹر دینہ کو مزید فعال اور معیاری طبی مرکز بنانے کے لیے ہنگامی بنیادوں پر اقدامات کیے جائیں۔ انہوں نے زور دیا کہ دور دراز علاقوں سے آنے والے مریضوں کو مفت ادویات، بروقت علاج اور بہتر طبی سہولیات کی فراہمی ہر صورت یقینی بنائی جائے اور اس سلسلے میں کسی قسم کی غفلت یا کوتاہی برداشت نہیں کی جائے گی۔
ڈپٹی کمشنر نے اسسٹنٹ کمشنر دینہ کو ہسپتال کے انتظامی امور کی باقاعدہ نگرانی، صفائی ستھرائی کے معیار کو مزید بہتر بنانے اور او پی ڈی میں آنے والے مریضوں کے لیے سہولیات کو زیادہ آرام دہ اور مؤثر بنانے کی بھی ہدایات جاری کیں۔
انہوں نے کہا کہ عوام کو معیاری اور بروقت طبی سہولیات کی فراہمی حکومت پنجاب کی اولین ترجیحات میں شامل ہے اور ضلعی انتظامیہ صحت کے شعبے میں خدمات کے معیار کو بہتر بنانے کے لیے ہر ممکن اقدامات جاری رکھے گی۔
