لندن: برینٹ لندن بارو کونسل کے نوجوان کونسلر ثقلین آفتاب چوہدری نے برطانیہ کا سال 2023کا بہترین نوجوان کونسلر کا ایوارڈ جیت لیا۔
بہترین کونسلر کا ایوارڈ لوکل گورنمنٹ انفارمیشن یونٹ کے اسپانسر سے پورے برطانیہ کے کونسلرز کے مقابلے کے بعد دیا جاتا ہے۔ ایوارڈ پورے برطانیہ میں ایسے کونسلر کو دیا جاتا ہے جس نے بحیثیت کونسلر شاندار خدمات سرانجام دی ہوں۔
نوجوان کونسلر ثقلین آفتاب چوہدری کا سیاسی تعلق لیبر پارٹی سے ہے وہ گزشتہ سال ہی پہلی مرتبہ برینٹ بارو کونسل آف لندن سے کونسلر منتحب ہوئے تھے، پورے برطانیہ سے تقریباً ایک ہزار سے زائد کونسلر کا نام ایوارڈ کیلئے تجویز کیا تھا جن میں سے کونسلر ثقلین آفتاب چوہدری کا نام بہترین نوجوان کونسلر کیلئے منتخب کیا گیا ۔
کونسلر ثقلین آفتاب چوہدری کا آبائی تعلق کھوئی رٹہ ضلع کوٹلی آزاد کشمیر سے ہے۔ ثقلین آفتاب چوہدری نوجوان، اعلیٰ تعلیم یافتہ سیاسی ورکر ہیں جن کی برینٹ لندن ولزڈن گرین کمیونٹی میں اچھی شہرت ہے، وہ نوجوانوں اور کمیونٹی میں سماجی خدمات کی بنا پر انتہائی مقبول ہیں ، نوجوان ثقلین آفتاب چوہدری اپنی سیاسی و سماجی خدمات کے حوالے سے ممتاز پہچان رکھتے ہیں۔
عوامی خدمت کمیونٹی کے مسائل کے حل کیلئے ہمہ جہت ثقلین آفتاب پچھلے 8سال سے لیبر پارٹی کے ممبر ہیں اورپچھلے3سال سے برینٹ سنٹرل CLP کے خزانچی بھی ہیں۔ مقامی برانچ آرگنائزر اور GC، EC کے مستقل ممبر ہیں۔ برینٹ یوتھ پارلیمنٹ کے صدر کے طور پر دو سال تک خدمات انجام دینے پر انہیں ’’پرائیڈ آف برینٹ پریسٹیجیئس ایوارڈ‘‘ سے بھی نوازا گیا۔
انہوں نے لیبر فرینڈ آف پاکستان کے ممبر و ہاؤس آف کامنز کے نوجوانوں کے نمائندے کے طور پر فعال کردار ادا کیا وہ متعدد شیڈو کابینہ کے اراکین کے ساتھ مل کر کام کرنے کا تجربہ رکھتے ہیں ثقلین آفتاب چوہدری پیشے کے لحاظ سے اکاؤنٹنٹ ہیں اور چارٹرڈ انسٹی ٹیوٹ آف مینجمنٹ CIMA میں ایک بڑے ملٹی نیشنل گروپ کیلئےکام کر رہے ہیں۔
سسیکس یونیورسٹی سے گریجویشن اور مالیات کے ساتھ بی ایس سی اکاؤنٹنسی بھی کی ہے۔ کونسلر ثقلین آفتاب چوہدری کے دادا چوہدری محمد اسلم برینٹ کونسل کے سابق میئر ہیں وہ متعدد بار کونسلر منتحب ہوئے، وہ سابق سیکرٹری جنرل پاکستان کمیونٹی سنٹر ولزڈن گرین تھے، وہ خود بھی چارٹرڈ اکاؤنٹنٹ ہیں۔
