دبئی: قونصلیٹ جنرل آف پاکستان دبئی کے قونصل جنرل حسین محمد نے پاکستان بزنس کونسل (PBC) دبئی کے نئے بورڈ کے ساتھ قونصلیٹ جنرل آف پاکستان میں ملاقات کی، پی بی سی کے چیئرمین شبیر مرچنٹ نے نئے شامل ہونے والے ممبران کا تعارف کرایا اور 2025-2026 کے لیے کونسل کا اسٹریٹجک روڈ میپ شیئر کیا۔ شبیر مرچنٹ نے کہا کہ پی بی سی کا مقصد تجارت، سرمایہ کاری اور ثقافتی تبادلوں میں مشترکہ کوششوں کے ذریعے پاکستان اور متحدہ عرب امارات کے درمیان تعلقات کو مضبوط بنانا ہے۔
انہوں نے مزید کہا کہ کونسل باہمی ترقی کے مواقع سے فائدہ اٹھانے اور دونوں ممالک کے درمیان گہرے روابط کو فروغ دینے کے لیے پرعزم ہے۔ نئے بورڈ کو مبارکباد دیتے ہوئے، ایچ ای حسین محمد نے ممبران کے لیے نیک خواہشات کا اظہار کیا اور متحدہ عرب امارات میں پاکستان کی اقتصادی صلاحیت کو فروغ دینے کے لیے پی بی سی کی کوششوں کو سراہا۔ انہوں نے ان کی حوصلہ افزائی کی کہ وہ پاکستان اور متحدہ عرب امارات کے درمیان دو طرفہ تجارت اور سرمایہ کاری کو بڑھانے کے لیے ٹھوس اقدامات کریں۔
قونصل جنرل نے کاروباری رہنماؤں کو پاکستان کے متنوع شعبوں بشمول آئی ٹی، مینوفیکچرنگ، زراعت اور سیاحت میں مواقع تلاش کرنے کی ضرورت پر زور دیا۔ انہوں نے کہا کہ پاکستان سرمایہ کاری اور تجارت کے لیے بے پناہ مواقع فراہم کرتا ہے، اسپیشل انویسٹمنٹ فیسیلیٹیشن کونسل (SIFC) سرمایہ کاروں کی سہولت کے لیے سنگل ونڈو کے طور پر قائم کی گئی ہے۔
انہوں نے پاکستان بزنس کونسل پر زور دیا کہ وہ نئی پارٹنرشپس بنانے اور موجودہ شراکت داریوں کو بڑھانے کے لیے ایک پل کا کام کرے۔ قونصل جنرل نے کونسل کو قونصلیٹ کے تعاون کا یقین دلایا اور پاکستان اور متحدہ عرب امارات کے تعلقات کو مضبوط بنانے کے لیے مشن کے عزم کا اعادہ کیا۔ اجلاس میں علی زیب خان، تجارت اور سرمایہ کاری کے قونصلر اور قونصلیٹ کے دیگر اعلیٰ حکام اور پی بی سی کے اراکین نے بھی شرکت کی۔
