پاکستانی سال بھر گوگل پر مختلف کھانوں کی تراکیب تلاش کرتے ہیں، حیران کن طور پر سال 2023 میں سب سے زیادہ سموسے بنانے کی ترکیب کو تلاش کیا گیا۔ فہرست میں دوسرے نمبر پر کلیجی بنانے کی ترکیب جب کہ تیسرے نمبر پر شیر خورما بنانے کی ترکیب ہے۔
گوگل ہر برس دسمبر میں پاکستان سمیت دنیا کے متعدد ممالک کے انٹرنیٹ صارفین کی جانب سے تلاش کی جانے والی کیٹیگریز کی فہرست جاری جاری کرتا ہے۔ امسال پاکستان کے حوالے سے 8 کیٹیگریز کی فہرست جاری کی گئی ہے جس میں کھیل، تقریبات، خبروں، فلموں اور ٹی وی شوز، شخصیات، کھانے بنانے کی تراکیب، مختلف چیزیں بنانے کی تراکیب اور ٹیکنالوجی کی کیٹیگریز شامل ہیں۔
گوگل رپورٹ کے مطابق حیران کن طور پر سموسے بنانے کی ترکیب کو سب سے زیادہ وفاقی دارالحکومت اسلام آباد کے رہائشیوں نے سرچ کیا۔ دوسرے نمبر پر صوبہ سندھ کے صارفین رہے اور تیسرے نمبر پر پنجاب کے صارفین نے سموسے بنانے کی ترکیب کو دلجمعی سے سرچ کیا۔
کھیلوں کی خبروں میں پاکستانی انٹرنیٹ صارفین نے سب سے زیادہ پاکستان بمقابلہ نیوزی لینڈ کے کرکٹ ورلڈ کپ 2023 کے میچ کی تازہ ترین صورتحال کو سرچ کیا۔ پھر پاکستان سپر لیگ (پی ایس ایل) سے متعلق معلومات تلاش کا نمبر آتا ہے۔
پاکستانیوں نے گوگل پر سب سے زیادہ ہولی وڈ فلم اوپنہائمر تلاش کی جبکہ دوسرے نمبر پر شاہ رخ خان کی فلم ’جوان‘، تیسرے نمبر پر ’پٹھان‘ اور چوتھے نمبر پر ہولی وڈ فلم ’باربی‘ کو تلاش کیا گیا۔
ٹیکنالوجی کی کیٹیگری میں پیغام رسانی اور وصولی کی معروف ایپ واٹس ایپ پر چینلز بنانے کا طریقہ کار پہلے نمبر، چیٹ جی پی ٹی سے متعلق معلومات کی تلاش دوسرے نمبر پر جبکہ تیسرے نمبر پر چینی اسمارٹ موبائل انفینکس کے نوٹ سیریز کے فونز سے متعلق معلومات تلاش تھی۔
کینیڈا کے ویزے کے لیے درخواست دینے کے طریقے اور لوازمات کی معلومات کی تلاش بھی سرفہرست رہی جبکہ ریئلٹی گیم شو ’تماشا گھر‘ کو بھی لاکھوں صارفین کے تلاش کیا۔
خبروں میں سب سے زیادہ فلسطین میں اسرائیلی حملوں سے متعلق خبریں تلاش کی گئیں، دوسرے نمبر پر احساس پروگرام سے مدد حٓصل کرنے کی معلومات جبکہ تیسرے نمبر پر ٹک ٹاکر علیزہ سحر کی لیک ہونے والی ویڈیو تلاش کی گئی۔
ٹک ٹاکر حریم شاہ گوگل پر تلاش کی جانے والی شخصیات کی کیٹیگری میں پہلے نمبر پر رہیں، دوسرے نمبر پر علیزہ سحر جبکہ تیسرے نمبر پر بولی وڈ اداکار ٹائیگر شروف کو سرچ کیا گیا۔
