جہلم چیمبر آف کامرس اینڈ انڈسٹری کے سابق صدر اور معروف کاروباری شخصیت حاجی زاہد حسین بٹ نے اپنے ساتھیوں کے ہمراہ جہلم پریس کلب میں ایک پرہجوم پریس کانفرنس کرتے ہوئے چیمبر آف کامرس کی حلف برداری کی تقریب سمیت تمام تقریبات کے بائیکاٹ کا اعلان کردیا۔
انہوں نے چیمبر کے انتظامی امور، وال آف آنر سے پینا فلیکس اتارے جانے اور نومنتخب عہدیداران کی جانب سے تاحال حلف برداری کی تقریب منعقد نہ کیے جانے پر اپنے تحفظات کا اظہار کیا۔
پریس کانفرنس سے خطاب کرتے ہوئے حاجی زاہد حسین بٹ نے کہا کہ چیمبر آف کامرس کی عمارت کی تعمیر کے بعد منعقدہ فل ہاؤس اجلاس میں منظوری کے نتیجے میں وال آف آنر پر تمام 26 عہدیداران کے ناموں پر مشتمل پینا فلیکس آویزاں کی گئی تھی۔ ان کے مطابق حالیہ انتخابات میں ان کے مدمقابل امیدوار اظہر اقبال ڈار نے ایک ووٹ کی برتری سے کامیابی حاصل کی، جسے انہوں نے جمہوری عمل کا حصہ تسلیم کیا۔
حاجی زاہد حسین بٹ کا کہنا تھا کہ انہوں نے انتخابی نتائج کے بعد نومنتخب عہدیداران کو خیرسگالی کے طور پر مبارک باد پیش کی اور چیمبر سمیت تاجر برادری کی فلاح و بہبود کے لیے مشترکہ طور پر کام کرنے کے عزم کا اظہار کیا تھا۔
انہوں نے کہا کہ چیمبر آف کامرس کی نومنتخب قیادت کی حلف برداری کی تقریب تاحال منعقد نہیں ہوئی، جبکہ ایگزیکٹو ممبران کی حلف برداری کے حوالے سے بھی کسی اجلاس کے انعقاد کی اطلاع سامنے نہیں آئی۔ ان کے بقول یہ صورتِ حال کئی سوالات کو جنم دیتی ہے، اس لیے چیمبر کی انتظامیہ کو ان معاملات پر وضاحت پیش کرنی چاہیے۔
پریس کانفرنس کے دوران جہلم کے معروف سینئر صحافی اور سابق ایگزیکٹو ممبر چوہدری سہیل عزیز، نومنتخب ایگزیکٹو ممبر چوہدری شبیر گجر اور نومنتخب ایگزیکٹو ممبر چوہدری شکیل گجر نے بھی مختلف سوالات کے جوابات دیتے ہوئے اپنے مؤقف کا اظہار کیا۔
اس موقع پر چیمبر کے انتظامی معاملات، وال آف آنر کی حیثیت اور سابق و نومنتخب عہدیداران کے درمیان باہمی مشاورت کی اہمیت پر بھی گفتگو ہوئی۔ پریس کانفرنس کے شرکاء نے زور دیا کہ چیمبر آف کامرس کے امور شفافیت، باہمی احترام اور طے شدہ قواعد و ضوابط کے مطابق چلائے جائیں تاکہ کاروباری برادری کا اعتماد برقرار رہے۔
