جہلم: تھانہ کالا گجراں پولیس نے کارروائی کرتے ہوئے غفلت و لاپرواہی سے ہائی ایس چلانے اور موٹر سائیکل سوار فیملی کو زخمی کرنے کے الزام میں ڈرائیور کو گرفتار کرلیا۔
ترجمان جہلم پولیس کے مطابق جہلم میں ایس ایچ او تھانہ کالا گجراں اور ان کی ٹیم نے کارروائی کرتے ہوئے حادثے کے ذمہ دار ڈرائیور کو گرفتار کیا۔ پولیس حکام کا کہنا ہے کہ مقدمے کی تفتیش مکمل کرکے ٹھوس شواہد کی بنیاد پر چالان عدالت میں پیش کیا جائے گا تاکہ ملزم کو قانون کے مطابق سزا دلوائی جاسکے۔
ڈی پی او جہلم شفیق احمد چوہدری نے کہا کہ شاہراہوں پر محفوظ سفر کو یقینی بنانا اور شہریوں کی جان و مال کا تحفظ جہلم پولیس کی اولین ترجیحات میں شامل ہے۔ انہوں نے واضح کیا کہ شہریوں کی جان کو خطرے میں ڈالنے اور ٹریفک قوانین کی خلاف ورزی کرنے والے ڈرائیوروں کے خلاف بلاامتیاز قانونی کارروائی عمل میں لائی جائے گی۔
