جہلم شہر اور گردو نواح میں پٹرول اور ڈیزل میں ملاوٹ، پیمانوں میں ہیرا پھیری معمول بن گئی، ناقص تیل کی وجہ سے شہریوں کی گاڑیاں کھٹارہ بننے لگیں۔
تفصیلات کے مطابق جہلم شہر، دینہ، سوہاوہ اور پنڈدادنخان میں پٹرول پمپ مالکان نے پٹرول اور ڈیزل میں ملاوٹ اور پیمانوں میں ہیرا پھیری کر کے صارفین کو چونا لگانا شروع کر رکھا ہے۔
ملاوٹ مافیا کے ناقص پٹرول اور ڈیزل کے استعمال سے شہریوں کے ٹریکٹرز، بسیں اور ویگینوں، کاروں اور موٹر سائیکلوں کے انجن ناکارہ ہونے لگے ہیں اور گاڑیاں کھٹارہ بنتی جارہی ہیں۔ گاڑیوں سے نکلنے والے دھوئیں سے فضائی آلودگی بڑھ رہی ہے۔ ٹرانسپورٹ مالکان کو ماہانہ لاکھوں روپے کا نقصان برداشت کرنا پڑ رہا ہے۔
شہریوں نے نگران وزیر اعلی پنجاب اور چیف سیکرٹری پنجاب سے مطالبہ کیا ہے کہ ضلع بھر میں موجود پٹرول پمپس چیک کروائے جائیں ناقص، غیر معیاری اور کم مقدار میں پٹرول فروخت کرنے والے پٹرول پمپس مالکان کے خلاف کارروائیاں کرتے ہوئے پٹرول پمپس سیل کئے جائیں تاکہ شہریوں کی قیمتی گاڑیاں تباہ ہونے سے بچ سکیں۔
