جہلم: ڈپٹی کمشنر جہلم میر رضا اوزگن کی خصوصی ہدایت پر اسسٹنٹ کمشنر جہلم آفتاب اشرف نے شہر کے مختلف علاقوں میں نالوں اور جوہڑوں کی فینسنگ کے کام کا باقاعدہ آغاز کروا دیا ہے، جس کا مقصد برسات کے موسم میں ممکنہ حادثات سے شہریوں کو محفوظ رکھنا ہے۔
اسسٹنٹ کمشنر آفتاب اشرف نے موقع پر موجود واسا حکام کو ہدایات جاری کرتے ہوئے کہا کہ گہرے نالوں اور جوہڑوں کو فوری طور پر کور کیا جائے اور آبادی کے قریب موجود خطرناک مقامات پر ترجیحی بنیادوں پر کام مکمل کیا جائے۔
انہوں نے واضح کیا کہ فینسنگ کے عمل میں معیار پر کوئی سمجھوتہ نہیں کیا جائے گا اور تمام حفاظتی اقدامات کو یقینی بنایا جائے تاکہ کسی بھی ناخوشگوار واقعے سے بچا جا سکے۔
ضلعی انتظامیہ کے مطابق شہریوں کے تحفظ کے لیے مربوط اقدامات کیے جا رہے ہیں، جبکہ ڈپٹی کمشنر میر رضا اوزگن کی ہدایات پر واسا اور دیگر متعلقہ اداروں کو متحرک کر دیا گیا ہے تاکہ نالوں کی صفائی اور باؤنڈری وال کی تعمیر کا کام بروقت اور معیاری انداز میں مکمل کیا جا سکے۔
انتظامیہ نے شہریوں سے بھی اپیل کی ہے کہ وہ احتیاطی تدابیر اختیار کریں اور بچوں کو خطرناک مقامات سے دور رکھیں تاکہ کسی بھی حادثے سے بچا جا سکے۔
