جہلم: ملک پر 200 خاندان ہر دفعہ پارٹیاں بدل بدل کر اقتدار میں آ جاتا ہے، عوام کو اب ہوش کے ناخن لینا ہوں گے اور 8 فروری کو ترازو پر مہر لگا کر ان ظالم حکمرانوں سے اپنا بدلہ لینا ہو گا۔
ان خیالات کا اظہار جماعت اسلامی ضلع جہلم کے امیدواروں سید ضیاء اللّٰہ بخاری امیدوار این اے 60 ، مرزا محمد افضال امیدوار پی پی 25 ، راجہ ندیم احمد امیدوار پی پی 26 اور امیر جماعت اسلامی جہلم شہر حافظ ظفر اقبال ملک نے اپنے خطاب میں کیا۔ ان کا کہنا تھا کہ ہم نے اللّٰہ سے اسلامی نظام کے نفاذ کے لیے خطہ زمین پاکستان کا مطلب کیا لاالہ الااللہ کے نعرے پر لیا لیکن اسے حاصل کرنے کے بعد اپنے وعدے کو بھلا دیا جس کا نتیجہ یہ نکلا کہ ہم روز بروز مسائل کی دلدل میں دھنستے جا رہے ہیں ، جماعت اسلامی ہر مشکل وقت میں عوام کے ساتھ کھڑی ھوتی ہے جس کو اپنے پرائے سب مانتے ہیں۔
انہوں نے کہا کہ ہم بغیر اقتدار میں آئے عوام کی دستیاب وسائل میں حتیٰ المقدور بلا تفریق رنگ و نسل خدمت کر رہے ہیں، اگر عوام اپنے ووٹ کے ذریعے ہمیں اقتدار تک پہنچاتی ہے تو ہم یہی کام بہت بہتر انداز میں کر سکیں گے جس کا ثبوت کراچی میں عبدالستار افغانی، مولانا نعمت اللّٰہ خان اور اب حافظ نعیم کی شکل میں موجود ہے۔
انہوں نے کہا کہ ہمیں عوام نے جب جب خدمت کا موقع دیا ہم نے دن رات ایک کر کے اس کا حق ادا کیا۔ اب بھی عوام سے اپیل ہے کہ 8 فروری کو ترازو پر مہر لگا کر ہمیں خدمت کا موقع دیں، جماعت اسلامی کے دیانتدار ، اللہ کا خوف رکھنے والے نمائندے سراج الحق کی قیادت میں آپ کو انشاء اللہ مایوس نہیں کریں گے ۔
