جہلم: ضلع جہلم چوروں ڈاکوؤں کے ریڈار پر، پولیس چوروں کے سامنے بے بس، نامعلوم چور رات کی تاریکی میں صحافی کے دفتر کے صفایا کرگئے جبکہ بینک سے رقم نکلوانے والے تاجر اور بزرگ خاتون کو دن دیہاڑے لوٹ لیا گیا۔ تھانہ لِلہ کے علاقے میں نامعلوم چور 20 بکریوں کا ریوڑ بھی ساتھ لے گئے، سادہ لوح خاتون سے طلائی زیورات اور نقدی بھی چھین لی گئی۔
تفصیلات کے مطابق ضلع جہلم کے مختلف علاقوں میں چوریوں، ڈکیتیوں سمیت سٹریٹ کرائم میں غیر معمولی اضافہ ہو گیا۔ دو روز قبل جادہ بینک میں کیش جمع کروانے کے لئے آنے والے تاجر سے نقدی چھین لی گئی۔
محمدی چوک میں دن 12 بجے کے قریب محلہ سلطان پورہ کی رہائشی بزرگ خاتون بینک سے پنشن نکلوا کر نکلی تو بینک کے باہر کھڑی نامعلوم خاتون اس کے ہمراہ چل پڑی ، خاتون کمیلہ روڈ کی طرف محمدی چوک سے چند قدم آگے گرائمر سکول کے پاس پہنچی تو وہاں ایک کار جو پہلے سے موجود تھی ساتھ چلتی عورت نے دھکا دے کر بزرگ عورت کو گاڑی میں ڈالا اور خود بھی جلدی سے بیٹھ گئی۔
گاڑی میں پہلے سے موجود شخص نے گاڑی جادہ کی طرف دوڑا لی ، بزرگ عورت سے نقدی اور کانوں سے سونے کی بالیاں اتار لی گئیں اور جادہ ویران جگہ پر اتار کر رفو چکر ہو گئے۔
تھانہ لِلہ کے علاقہ میں نامعلوم چور محنت کش کی 20 بکریوں کا ریوڑ لیکر غائب ہو گئے۔ بلال ٹاؤن میں نجی میڈیکل سٹور کے رات کی تاریکی میں تالے توڑ کر چوری کرلی گئی۔
نجی ٹی وی چینل کے رپورٹر معروف سینئر صحافی راجہ نوبہار خان کے دفتر میں نامعلوم چوروں نے گھس کر لیپ ٹاپ اور دیگر قیمتی سامان چوری کرلیا۔
شہریوں نے نو منتخب وزیراعلیٰ پنجاب ، آئی جی پنجاب اور چیف سیکرٹری پنجاب سے مطالبہ کیاہے کہ ضلع جہلم میں ہونے والی چوریوں ، ڈکیتیوں کا نوٹس لیتے ہوئے فرض شناس، چاک و چوبند، ایماندارافسران کو تعینات کیاجائے تاکہ ضلع جہلم کے عوام کو چوروں ڈاکوؤں کی لوٹ مار سے بچایا جا سکے۔
