جہلم: اندرون شہرکی سڑکیں چنگ چی رکشہ اسٹینڈ میں تبدیل، سڑکوں پر تجاوزات کی بھرمار، موٹر سائیکلیں، کاریں اور چنگ چی رکشے سڑکوں پر کھڑے کیے جانے لگے۔ کمرشل پلازوں، نجی اسپتالوں، سکولز، کالجز، میرج ہالز اور مارکیز کی پارکنگ کابھی کوئی وجود نہیں جس کی وجہ سے شہر اور مضافاتی علاقوں سے خریداری کیے آنے والے خریدار اپنی گاڑیاں سڑکوں پرکھڑی کر کے ٹریفک مسائل کا سبب بنتے ہیں، سڑکیں تنگ ہونے کی وجہ سے شہریوں کوسخت مشکلات کاسامنا ہے۔
تفصیلات کے مطابق اندرون شہر جہلم کی سڑکوں پر بڑھتا ہوا ٹریفک کا سیلاب شہریوں کیلئے درد سر بن گیا۔ سول لائن، ریلوے روڈ، اولڈ جی ٹی روڈ، تحصیل روڈ سمیت سول لائن روڈ پرگاڑیوں کی لمبی قطاریں رات گئے تک لگی رہتی ہیں۔ سرکاری ونجی تعلیمی اداروں میں چھٹی کےاوقات میں سڑکوں پر تل دھرنے کی جگہ نہیں ملتی۔
شہریوں نے کہا کہ ٹریفک جام کی بڑی وجہ سڑکوں پر چنگ چی لوڈر رکشوں اور ریڑھی بانوں کی وجہ سے تجاوزات قائم ہوتی ہے. تجارتی پلازوں، کاروباری مارکیٹوں، سرکاری ونجی تعلیمی، اداروں اسپتالوں کے باہر پارکنگ کے لیے جگہ کے مختص نہ ہونے کی وجہ سے دن بدن مشکلات میں اضافہ ہورہا ہے۔
شہری تنظیموں کے عمائدین نے وزیراعلی پنجاب، چیف سیکرٹری پنجاب، سیکرٹری بلدیات، انسپکٹر جنرل پنجاب پولیس اور ڈپٹی انسپکٹر جنرل ٹریفک پولیس سے نوٹس لینے اور اصلاح احوال کامطالبہ کیا ہے۔
