جہلم شہر اور گردونواح میں ایل پی جی گیس سلنڈروں کی قیمتیں آسمان سے باتیں کرنے لگیں۔
شہریوں کے مطابق ایل پی جی گیس کی من مانے نرخوں پر فروخت کا سلسلہ بدستور جاری ہے، جہاں سرکاری نرخ 3,296 روپے مقرر ہونے کے باوجود گھریلو گیس سلنڈر مارکیٹ میں 6 ہزار سے 6700 روپے تک فروخت کیا جا رہا ہے۔
ایل پی جی کی قیمتوں میں مبینہ اضافے اور من مانے نرخوں پر فروخت نے غریب اور متوسط طبقے سے تعلق رکھنے والے شہریوں کی مشکلات میں مزید اضافہ کر دیا ہے۔ شہریوں کا کہنا ہے کہ مہنگائی کے باعث پہلے ہی گھریلو اخراجات پورے کرنا مشکل ہو چکا ہے، جبکہ گیس سلنڈروں کی بھاری قیمتوں نے ان کے لیے مزید پریشانیاں پیدا کر دی ہیں۔
شہریوں نے احتجاج کرتے ہوئے وزیراعظم پاکستان اور چیف جسٹس آف پاکستان سے مطالبہ کیا ہے کہ جہلم اور گردونواح میں ایل پی جی گیس کی مبینہ من مانے نرخوں پر فروخت کا نوٹس لیا جائے اور مقررہ سرکاری قیمتوں پر عمل درآمد یقینی بنانے کے لیے متعلقہ ذمہ داران کے خلاف کارروائی کی جائے۔
