جہلم: ضلع جہلم میں وزیر اعلیٰ پنجاب مریم نواز کے ”اپنی چھت، اپنا گھرسکیم” کے تحت سرٹیفکیٹ تقسیم کرنے کا سلسلہ زور و شور سے جاری ہے۔ ممبر قومی اسمبلی چوہدری فرخ الطاف نے مزید دو گھرانوں کو سرٹیفکیٹ تقسیم کیے۔
اس موقع پر چوہدری فرخ الطاف نے کہا کہ یہ سکیم وزیر اعلیٰ پنجاب کے عوامی فلاحی منصوبوں کا حصہ ہے، جس کا مقصد شہریوں کے اپنا گھر بنانے کے خواب کو حقیقت میں بدلنا ہے۔
چوہدری فرخ الطاف نے کہا کہ وزیر اعلیٰ پنجاب کی جانب سے متعدد عوامی فلاحی منصوبے شروع کیے گئے ہیں، جن کا مقصد صوبے کے عوام کو بنیادی سہولیات فراہم کرنا اور انہیں معاشی و معاشرتی بہتری کی طرف گامزن کرنا ہے۔
انہوں نے کہا کہ ”اپنی چھت، اپنا گھر” سکیم کم آمدنی والے گھرانوں کے لئے بڑی نعمت ہے، جس سے نہ صرف شہریوں کو اپنی چھت مل رہی ہے بلکہ ان کا معیار زندگی بھی بہتر ہو رہا ہے۔
انہوں نے مزید کہا کہ حکومت پنجاب ان منصوبوں کو بروقت اور شفافیت کے ساتھ مکمل کر رہی ہے تاکہ زیادہ سے زیادہ لوگ اس سے مستفید ہو سکیں۔
انہوں نے امید ظاہر کی کہ اس سکیم کے ذریعے ضلع جہلم کے کم آمدن والے شہریوں کو مستقل رہائش فراہم کی جائے گی اور مزید گھرانوں میں سرٹیفکیٹس تقسیم کیے جائیں گے۔
