جہلم: ڈسٹرکٹ پولیس آفیسر (ڈی پی او) جہلم طارق عزیز سندھو کی زیر صدارت ڈی پی او آفس میں اردل روم کا انعقاد کیا گیا، جس میں مجموعی طور پر 27 پولیس افسران و اہلکاران پیش ہوئے۔ ان میں سے 12 افسران نے ویڈیو لنک کے ذریعے شرکت کی۔
اردل روم کے دوران ڈی پی او جہلم نے پیش ہونے والے تمام افسران و اہلکاران کا موقف بغور سنا اور میرٹ کی بنیاد پر فیصلے صادر کیے۔ شوکاز نوٹسز کے فیصلے سناتے ہوئے بعض افسران کو فرائض میں غفلت برتنے پر سزائیں بھی دی گئیں جن میں سروس ضبطگی، تنخواہوں میں کٹوتی اور سخت وارننگ شامل ہیں۔
ڈی پی او طارق عزیز سندھو نے اس موقع پر تمام افسران کو ہدایت کی کہ وہ اپنی ذمہ داریاں ایمانداری، دیانت اور فرض شناسی سے ادا کریں۔ نظم و ضبط اور اعلیٰ تربیت ہی ایک اچھے پولیس افسر کی پہچان ہے۔ ان کا کہنا تھا کہ نااہل، کام چور اور بددیانت اہلکاروں کے لیے محکمے میں کوئی گنجائش نہیں۔
ڈی پی او جہلم نے مزید کہا کہ پولیس فورس کی کارکردگی کو بہتر بنانے کے لیے ایسے اقدامات باقاعدگی سے کیے جاتے رہیں گے تاکہ عوام کو بہتر اور فوری انصاف کی فراہمی یقینی بنائی جا سکے۔
