جہلم: حکومت تبدیل ہوئی لیکن افسران کی پالیسیاں جوں کی توں، عید الفطر کی آمد آمد، میونسپل کمیٹی کے ذمہ داران نے شہریوں کے مسائل سے لا تعلقی اختیار کرلی، آج کے ترقی یافتہ دور میں بھی شہری گھپ اندھیرے میں مساجد تک جانے پر مجبور، رمضان المبارک کے بابرکت مہینے میں بھی اندرون شہرکی سڑکوں اورملحقہ آبادیوں میں سٹریٹ لائٹس روشن نہ ہو سکیں۔
تفصیلات کے مطابق رمضان المبارک کا آخری عشرہ بھی اختتام کی جانب بڑھ رہا ہے اور عید الفطر قریب آرہی ہے، میونسپل کمیٹی کے ذمہ داران نے حسب ِ سابق روایت جہلم شہر میں نصب سڑیٹ لائٹس کو روشن کرنے کے حوالے سے کسی قسم کے اقدامات نہیں کئے جس کی وجہ سے شہریوں کو مساجد جانے اور آنے میں شدید مشکلات کا سامنا کرنا پڑ رہاہے۔
جہلم شہر کے گنجان آباد علاقوں میں گھپ اندھیرا ہونے کی وجہ سے شہریوں کو نمازِ تراویح اور نمازِ فجر کی ادائیگی کے وقت مشکلات کا سامنا کرنا پڑتا ہے۔
سٹریٹ لائٹس روشن نہ ہونے کی وجہ سے سٹریٹ کرائم اور چوری چکاری کی وارداتوں کا خدشہ بھی لاحق ہو چکا ہے، آمدورفت کے دوران پیدل، سائیکل اور موٹر سائیکل سواروں کو اندھیرے کیوجہ سے شدید پریشانی کا سامنا رہتا ہے۔
شہریوں نے ایڈوائزر صوبائی محتسب اعلیٰ پنجاب جہلم، ڈپٹی کمشنر، ایڈمنسٹریٹر میونسپل کمیٹی اور چیف آفیسر میونسپل کمیٹی سے مطالبہ کیاہے کہ شہر کی سٹریٹ لائٹس مرمت کروا کر روشن کروائی جائیں تاکہ مساجد سمیت عید کی خریداری کے لئے جاتے وقت شہریوں کو پیش آنے والی مشکلات کا خاتمہ ممکن ہو سکے۔
