پنڈدادنخان پولیس نے ایک اہم کارروائی کے دوران ڈکیتی و نقب زنی کی متعدد وارداتوں میں ملوث معروف گینگ "عامر پوڈری گینگ” کے چار ملزمان کو گرفتار کر لیا ہے۔
تفصیلات کے مطابق جہلم کی تحصیل پنڈدادنخان میں ایس ایچ او تھانہ پنڈدادنخان ظہیرالدین بابر اور ان کی ٹیم نے کامیاب کارروائی کرتے ہوئے ملزمان عامر نواز، علی عمران، حسنین انور اور محمد اویس کو گرفتار کیا۔ پولیس نے ڈکیت ملزمان سے ڈکیتی و نقب زنی کی وارداتوں میں چھینی گئی رقم 4 لاکھ 17 ہزار 800 روپے اور 2 عدد پسٹل 30 بور معہ ایمونیشن برآمد کر لیے ہیں۔
پولیس کا کہنا ہے کہ ملزمان کے خلاف ٹھوس شواہد موجود ہیں اور انہیں عدالت میں چالان کر کے قرار واقعی سزا دلوائی جائے گی۔ اس گرفتاری کو پولیس کی ایک بڑی کامیابی قرار دیا جا رہا ہے، جس سے علاقے میں امن و امان کی فضاء مزید مستحکم ہو گی اور عوام کا پولیس پر اعتماد بحال ہو گا۔
ڈسٹرکٹ پولیس آفیسر جہلم طارق عزیز سندھو نے اس کارروائی کو اہم سنگ میل قرار دیتے ہوئے کہا کہ اس سے نہ صرف ملزمان کی گرفتاری عمل میں آئی ہے بلکہ عوامی تحفظ کے حوالے سے ایک مثبت قدم بھی اٹھایا گیا ہے۔
