جہلم: ڈپٹی کمشنر نے شہر کے مختلف علاقوں کا دورہ کرتے ہوئے تجاوزات گرانے کے بعد ملبہ اٹھانے اور صفائی کی صورتحال کا جائزہ لیا۔
تفصیلات کے مطابق ڈپٹی کمشنر جہلم میثم عباس نے علی الصبح سول لائن روڈ، شاندار چوک اور ریلوے روڈ سمیت شہر کے مختلف مقامات کا معائنہ کیا۔ انہوں نے تجاوزات کے خاتمے کے بعد باقی ملبہ فوری طور پر اٹھانے کی ہدایت دی تاکہ شہریوں کو کسی قسم کی دشواری کا سامنا نہ ہو اور شہر کی خوبصورتی بحال رہے۔
اس دوران انہوں نے راولپنڈی ویسٹ مینجمنٹ کمپنی (RWMC) کے حکام کو بازاروں، گلیوں اور محلوں میں مکمل صفائی یقینی بنانے کی ہدایت کی۔
اس موقع پر ڈپٹی کمشنر سید محمد میثم عباس نے آر ڈبلیو ایم سی کے ذمہ داران کو سختی سے ہدایت کی کہ اندرون شہر کے بازاروں، سڑکوں اور گلی کوچوں میں صفائی کے انتظامات مزید بہتر کیے جائیں اور گندگی کو فوری طور پر ٹھکانے لگایا جائے۔
انہوں نے کہا کہ صاف ستھرا ماحول نہ صرف شہریوں کی صحت کے لیے ضروری ہے بلکہ شہر کی خوبصورتی میں بھی اضافہ کرتا ہے۔
