سوہاوہ: گورنمنٹ گرلز ایلیمنٹری سکول پدھری میں داخلہ مہم کے سلسلے میں ایک شاندار افتتاحی تقریب کا انعقاد کیا گیا، جس میں مہمانِ خصوصی کے طور پر اے ای او آمنہ نے شرکت کی۔ ان کے سکول پہنچنے پر طالبات نے پرتپاک استقبال کیا۔
تقریب کا آغاز تلاوتِ قرآنِ پاک اور نعتِ رسول مقبول ﷺ سے کیا گیا۔ اس موقع پر طالبات کے والدین، اساتذہ اور مقامی کمیونٹی کے افراد بھی موجود تھے۔
افتتاحی تقریب میں اے ای او آمنہ نے فیتہ کاٹ کر داخلہ مہم کا باقاعدہ آغاز کیا۔ اپنے خطاب میں انہوں نے والدین کو مخاطب کرتے ہوئے کہا کہ وہ اپنے بچوں کو سرکاری سکولوں میں داخل کرائیں تاکہ کوئی بچہ تعلیم سے محروم نہ رہے۔
انہوں نے مزید کہا کہ حکومت کی جانب سے تمام بنیادی سہولیات فراہم کی جا رہی ہیں، اور سکولوں میں اساتذہ کی کمی کو بھی پورا کیا جا رہا ہے۔ والدین کو چاہیے کہ وہ اپنے اردگرد کے لوگوں کو بھی داخلہ مہم کے بارے میں آگاہ کریں تاکہ زیادہ سے زیادہ بچے تعلیم کے زیور سے آراستہ ہو سکیں۔
ہیڈمسٹریس مسرت وقار نے والدین کا شکریہ ادا کرتے ہوئے کہا کہ ان کی شرکت سے یہ ثابت ہوتا ہے کہ وہ اپنی بچیوں کے بہتر مستقبل کے لیے سنجیدہ ہیں۔ انہوں نے مزید کہا کہ داخلہ مہم کا مقصد والدین کو تعلیم کی اہمیت سے آگاہ کرنا ہے، اور تمام والدین، اساتذہ اور مقامی کمیونٹی کو مل کر اس مہم کو کامیاب بنانا ہوگا۔
انہوں نے بتایا کہ پلے گروپ سے لے کر دہم جماعت تک داخلے جاری ہیں، اور والدین کو چاہیے کہ وہ اپنی بچیوں کو جلد از جلد سکول میں داخل کرائیں۔
تقریب کے اختتام پر والدین اور اساتذہ نے اس مہم کی بھرپور حمایت کا یقین دلایا اور طالبات کے روشن مستقبل کے لیے ہر ممکن تعاون فراہم کرنے کی یقین دہانی کرائی۔
