جہلم میں پولیس کا منشیات فروشوں کے خلاف کریک ڈاؤن، 2 ملزمان کو گرفتار کر کے بھاری مقدار میں منشیات برآمد کر لی گئی۔
تفصیلات کے مطابق جہلم پولیس کا منشیات فروشوں کے خلاف بھرپور کریک ڈاؤن جاری ہے۔ تازہ کارروائی میں تھانہ کالا گجراں پولیس نے دو منشیات فروشوں کو گرفتار کر لیا اور ان کے قبضے سے بھاری مقدار میں منشیات برآمد کر لی گئی۔
پولیس کے مطابق کارروائی کے دوران ملزمان یوسف خان اور نعمان فیاض کو گرفتار کیا گیا۔ ملزم نعمان فیاض کے قبضے سے 1 کلو 340 گرام چرس جبکہ ملزم یوسف خان سے 1 کلو 260 گرام چرس برآمد کی گئی۔
پولیس نے ملزمان کے خلاف تھانہ کالا گجراں میں الگ الگ مقدمات درج کر لیے ہیں اور مزید تفتیش جاری ہے۔
پولیس حکام کا کہنا ہے کہ منشیات فروشوں کے خلاف سخت کارروائیاں جاری رہیں گی تاکہ معاشرے کو منشیات جیسے ناسور سے پاک کیا جا سکے۔
