دینہ: اسسٹنٹ کمشنر دینہ صفاء عابد نے مین بازار میں ناجائز تجاوزات کے خلاف کارروائی کرتے ہوئے 9 دوکانوں کو سیل کر دیا۔
یہ کارروائی ڈپٹی کمشنر جہلم میثم عباس کی ہدایت پر کی گئی۔ اسسٹنٹ کمشنر دینہ صفاء عابد کی قیادت میں ایک ٹیم نے مین بازار دینہ میں دوکانوں کے باہر سامان رکھنے والے دکانداروں کے خلاف کارروائی کی۔ اس دوران چیف آفیسر میونسپل کمیٹی دینہ محمد فیصل، ایم او آئی چوہدری سہیل اشرف اور دیگر عملہ بھی موجود تھا۔
اسسٹنٹ کمشنر دینہ صفاء عابد نے اس موقع پر گفتگو کرتے ہوئے کہا کہ متعدد بار دوکانداروں کو وارننگ دی گئی تھی مگر وہ باز نہیں آئے۔ عوامی شکایات پر کارروائی کرتے ہوئے غیر قانونی سامان رکھنے والی دوکانوں کو سیل کیا گیا۔
انہوں نے مزید کہا کہ یہ آپریشن روزانہ کی بنیاد پر جاری رکھا جائے گا اور دوکانداروں کو مارکیٹوں کے اندر غیر قانونی تجاوزات ختم کرنے کا حکم دیا جائے گا۔ انہوں نے خبردار کیا کہ اگر دوکانداروں نے آئندہ بھی غیر قانونی تجاوزات کیں تو ان کے خلاف سخت کارروائی کی جائے گی۔
اسسٹنٹ کمشنر دینہ صفاء عابد نے کہا کہ روزانہ کی بنیاد پر آپریشن جاری رہے گا تاکہ بازاروں کو تجاوزات سے پاک کیا جا سکے اور عوامی سہولت کو یقینی بنایا جا سکے۔
