جہلم: فلسطینی مسلمانوں سے اظہارِ یکجہتی اور اسرائیلی جارحیت کے خلاف جہلم میں پرامن ریلیوں کا انعقاد کیا گیا۔
مدرسہ انجمن تعلیم السلام شمالی محلہ سے شاندار چوک تک نکالی گئی ریلی میں شہریوں کی بڑی تعداد نے شرکت کی۔ ریلی کی قیادت معروف مذہبی و سیاسی شخصیت سید خلیل حسین کاظمی نے کی۔
شاندار چوک میں ریلی کے شرکاء سے خطاب کرتے ہوئے سید خلیل حسین کاظمی نے کہا کہ فلسطینیوں پر اسرائیل کی بمباری ظلم کی انتہا ہے۔ بے گناہ فلسطینیوں کا قتل عام اور معصوم بچوں کی شہادت اسرائیل کی کھلی دہشت گردی ہے۔
انہوں نے کہا کہ اُمتِ مسلمہ کو اب متحد ہو کر ایک مؤثر لائحہ عمل اپنانا ہوگا، کیونکہ عالمی دنیا کی خاموشی مسلمانوں کے لیے لمحۂ فکریہ ہے۔ انہوں نے مطالبہ کیا کہ تمام اسلامی ممالک مل کر اسرائیل کو دہشت گرد ملک قرار دلوانے کے لیے عملی اقدامات کریں۔
علاوہ ازیں جہلم پریس کلب کی جانب سے بھی اظہارِ یکجہتی کے طور پر ایک ریلی نکالی گئی جس کی قیادت چیئرمین پریس کلب چوہدری عابد محمود نے کی۔ انہوں نے شرکائے ریلی سے خطاب کرتے ہوئے کہا کہ عالمی برادری فوری طور پر جنگ بندی کے لیے اقدامات کرے۔ نہتے فلسطینیوں کا قتل، بچوں کو زندہ جلانا اور نسل کشی کسی بھی طور پر انسانیت کے دائرے میں نہیں آتا۔
اس موقع پر صحافیوں کی بڑی تعداد نے ریلی میں شرکت کی اور فلسطینی عوام سے بھرپور اظہارِ یکجہتی کیا۔
