جہلم: پاکستان ٹیلی کمیونیکیشن کمپنی لمیٹڈ (PTCL) سے ریٹائرڈ ہونے والے ہزاروں پنشنرز کو شدید مشکلات کا سامنا، پی ٹی ای ٹی (PTET) پنشنرز ٹرسٹ کی جانب سے ان کی ماہانہ پنشن بغیر کسی پیشگی اطلاع کے روک دی گئی۔ متاثرہ پنشنرز میں بڑی تعداد معمر شہریوں اور بیواؤں کی ہے، جو اب شدید معاشی پریشانی میں مبتلا ہو چکے ہیں۔
پنشنرز نے میڈیا نمائندگان سے گفتگو کرتے ہوئے کہا کہ انہوں نے تمام مطلوبہ دستاویزات بشمول بائیو میٹرک تصدیق اور لائف سرٹیفکیٹ متعلقہ بینکوں میں جمع کروائے، اس کے باوجود ان کی پنشن اچانک روک دی گئی، جس پر نہ کوئی پیشگی اطلاع دی گئی اور نہ ہی کوئی وضاحت سامنے آئی۔
متاثرہ افراد کا کہنا ہے کہ جب انہوں نے متعلقہ بینکوں سے رابطہ کیا تو بینک حکام نے واضح کیا کہ ان کی جانب سے کوئی تکنیکی مسئلہ نہیں ہے، پنشن کی بندش کا فیصلہ متعلقہ ادارے PTET نے کسی نامعلوم وجہ سے کیا ہے۔ اس حوالے سے پنشنرز کو جاری کردہ واٹس ایپ نمبرز پر بھی مسلسل مصروف لائن مل رہی ہے، جس سے ان کی پریشانی مزید بڑھ گئی ہے۔
ذرائع کا کہنا ہے کہ PTET کو ہزاروں کی تعداد میں پنشنرز کے لائف سرٹیفکیٹ موصول ہو چکے ہیں، تاہم عملے کی کمی کے باعث ان پر کام سست روی کا شکار ہے اور اسی وجہ سے پنشن کی ادائیگی میں تاخیر ہو رہی ہے۔
پنشنرز نے پی ٹی ای ٹی کی اعلیٰ انتظامیہ سے فوری نوٹس لینے کا مطالبہ کیا ہے۔ ان کا کہنا ہے کہ موجودہ مہنگائی کے دور میں پنشن کی رقم پہلے ہی نہایت کم ہے، ایسے میں اس کی بندش کسی المیے سے کم نہیں۔ انہوں نے مطالبہ کیا کہ فی الفور پنشن کی ادائیگی بحال کی جائے تاکہ بزرگ پنشنرز اور بیواؤں کو درپیش معاشی مسائل میں کمی آ سکے۔
