جہلم: تھانہ صدر پولیس نے بروقت اور مؤثر کارروائی کرتے ہوئے ہوائی فائرنگ کر کے عوام میں خوف و ہراس پھیلانے والے ملزم کو گرفتار کر لیا۔
پولیس ترجمان کے مطابق ایس ایچ او تھانہ صدر اور ان کی ٹیم نے پیشہ ورانہ مہارت کا مظاہرہ کرتے ہوئے ملزم اللہ دتہ کو گرفتار کیا۔ ملزم کے قبضے سے 12 بور بندوق بمعہ ایمونیشن برآمد کی گئی، جسے قبضے میں لے کر مقدمہ درج کر لیا گیا ہے۔
پولیس حکام کا کہنا ہے کہ عوام میں خوف پھیلانے اور قانون کو ہاتھ میں لینے والے عناصر کسی رعایت کے مستحق نہیں اور ان کے خلاف سخت کارروائی جاری رہے گی۔
اس موقع پر ڈسٹرکٹ پولیس آفیسر جہلم طارق عزیز سندھو نے کہا کہ قانون شکن عناصر پولیس کی گرفت سے نہیں بچ سکتے۔ شہریوں کی جان و مال کا تحفظ پولیس کی اولین ترجیح ہے اور اس سلسلے میں کوئی کوتاہی برداشت نہیں کی جائے گی۔
