پنڈدادنخان میں پولیس کی بڑی کارروائیاں، شراب سپلائر اور اشتہاری مجرم گرفتار

پنڈدادنخان/جلالپور شریف: جہلم پولیس کی جرائم پیشہ عناصر کے خلاف کامیاب کارروائیاں جاری، تھانہ پنڈدادنخان اور تھانہ جلالپور شریف پولیس نے دو الگ الگ کارروائیوں میں شراب سپلائر اور ڈس آنر کیس میں مطلوب اشتہاری مجرم کو گرفتار کر لیا۔

تفصیلات کے مطابق جہلم کی تحصیل پنڈدادنخان میں ایس ایچ او تھانہ پنڈدادنخان اور ٹیم نے کامیاب کارروائی کرتے ہوئے شراب سپلائی کرنے والے ملزم رمن پیارا کو گرفتار کر لیا۔ ملزم سے موقع پر 20 لیٹر شراب برآمد کی گئی، جس پر ملزم کے خلاف مقدمہ درج کر لیا گیا ہے۔

پولیس حکام کے مطابق ملزم شراب کی غیر قانونی سپلائی میں ملوث تھا اور اس کے خلاف تحقیقات کا دائرہ مزید وسیع کیا جا رہا ہے۔

ادھر تھانہ جلالپور شریف پولیس نے بھی جدید سائنسی ٹیکنالوجی کا استعمال کرتے ہوئے اہم پیش رفت حاصل کی ہے۔ ڈس آنر کے مقدمہ میں سال 2017 سے مطلوب اشتہاری مجرم نوید کو کامیاب کارروائی کے دوران گرفتار کر لیا گیا۔

ملزم گرفتاری سے بچنے کے لیے طویل عرصہ روپوش رہا، تاہم پولیس نے مسلسل محنت اور ٹیکنالوجی کی مدد سے اس کا سراغ لگا کر اسے دھر لیا۔

ڈسٹرکٹ پولیس آفیسر جہلم طارق عزیز سندھو نے کامیاب کارروائیوں پر پولیس ٹیموں کو سراہا اور کہا کہ "منشیات فروش اور جرائم پیشہ عناصر معاشرے کا ناسور ہیں، جن کے خلاف جہلم پولیس کی کارروائیاں جاری رہیں گی۔ اشتہاری مجرمان کی گرفتاری کے لیے بھی مربوط حکمت عملی کے تحت کریک ڈاؤن جاری ہے۔”