پنڈدادنخان میں منشیات کیس میں جرم ثابت ہونے پر مجرم کو 7 سال قید اور جرمانے کی سزا سنا دی گئی۔
تفصیلات کے مطابق جہلم کی تحصیل پنڈدادنخان کے تھانہ جلالپور شریف میں منشیات کیس میں جرم ثابت ہونے پر عدالت نے مجرم عرفان علی کو 7 سال قید اور 6 لاکھ روپے جرمانے کی سزا سنا دی۔ یہ فیصلہ مقدمہ نمبر 46/25 بجرم CNSA 9(2)6 میں سنایا گیا۔
مجرم عرفان علی کو سال 2025 میں منشیات فروشی کے سنگین جرم میں گرفتار کیا گیا تھا۔ جہلم پولیس نے مؤثر انٹیلی جنس اور بروقت کارروائی کرتے ہوئے مجرم کو ٹریس کر کے گرفتار کیا اور اس کے خلاف ٹھوس شواہد کے ساتھ چالان عدالت میں پیش کیا۔ پولیس کی مؤثر پیروی اور پیشہ ورانہ تفتیش کی بنیاد پر عدالت نے جرم ثابت ہونے پر قرار واقعی سزا سنائی۔
ڈی پی او جہلم طارق عزیز سندھو نے عدالت کے فیصلے کا خیر مقدم کرتے ہوئے کہا کہ منشیات فروش معاشرے کا ناسور ہیں، جن کے خلاف جہلم پولیس کا بلا تفریق آپریشن جاری ہے۔ انہوں نے مزید کہا کہ معاشرتی بگاڑ پیدا کرنے والے عناصر کو قانون کی گرفت میں لانا ہماری اولین ترجیح ہے۔
ڈی پی او نے مقدمے کی مؤثر پیروی پر انوسٹیگیشن ٹیم اور لیگل اسٹاف کو شاباش دیتے ہوئے ان کے لیے تعریفی اسناد اور نقد انعام کا اعلان بھی کیا۔ انہوں نے اس عزم کا اعادہ کیا کہ منشیات کی لعنت کو جڑ سے ختم کرنے کے لیے جہلم پولیس بھرپور عزم و جذبے سے کام جاری رکھے گی۔
