جہلم:: 5 اگست یوم استحصال کشمیر کے موقع پر جہلم میں احتجاجی ریلی کا انعقاد کیا گیا، جس کی قیادت ڈپٹی کمشنر جہلم میثم عباس اور ڈی پی او جہلم طارق عزیز سندھو نے کی۔
ریلی میں ضلع بھر کے سرکاری محکموں کے افسران، سیاسی و سماجی شخصیات، سول سوسائٹی اور شہریوں کی بڑی تعداد نے شرکت کی۔ شرکاء نے "پاکستان زندہ باد” اور "کشمیر بنے گا پاکستان” کے فلک شگاف نعرے لگائے۔
ریلی کا آغاز ڈپٹی کمشنر آفس سے ہوا اور جہلم پریس کلب پر اختتام پذیر ہوئی۔ ریلی سے خطاب کرتے ہوئے ڈی سی جہلم میثم عباس نے کہا کہ حکومت اور عوام کشمیریوں کے حقِ خود ارادیت کی مکمل حمایت جاری رکھیں گے، اور بھارت کی جانب سے 5 اگست 2019 کو کشمیر کی خصوصی حیثیت ختم کرنے کے عمل کو ایک ناقابل معافی جرم تصور کرتے ہیں۔
ڈی پی او جہلم طارق عزیز سندھو نے اپنے خطاب میں کہا کہ بھارت ستر سال سے کشمیر میں ظلم و بربریت کا بازار گرم کیے ہوئے ہے، لیکن دنیا کے امن پسند عوام کشمیریوں کے حق میں آواز بلند کر رہے ہیں۔
ریلی کا مقصد کشمیری عوام کی قربانیوں کو خراجِ تحسین پیش کرنا اور عالمی برادری کو مسئلہ کشمیر پر توجہ دلانا تھا۔
