دینہ جی ٹی روڈپر بھتہ مافیا سرگرم ، دینہ جی ٹی روڈ لیاری بنتا جارہا ہے ، جی ٹی روڈ پر واقع ویگن اسٹینڈ میں غنڈوں نے جنگل کا قانون نافذ کررکھا ہے ۔ ایم سی دینہ کی انتظامیہ اور پولیس سب کچھ جاننے کے باوجود خاموش تماشائی کا کردارادا کررہی ہے ۔
تفصیلات کے مطابق دینہ جی ٹی روڈ پر ویگن اسٹینڈ میں بھتہ مافیا نے اپنی الگ ریاست قائم کررکھی ہے ، سارا دن مافیا بھتہ وصولی کے لئے ٹرانسپورٹرز کو پرچیاں جاری کرکے ہزاروں روپے کی دیہاڑیاں لگا رہے ہیں ، میونسپل کمیٹی اور متعلقہ پولیس سب کچھ جاننے کے باوجود خاموش تماشائی کا کردار ادا کررہی ہے ۔
برلب جی ٹی روڈ قائم ویگن اسٹینڈز کے ڈرائیورز نے اخبار نویسوں سے گفتگو کرتے ہوئے بتایا کہ سابق دورِ حکومت میں ویگن اسٹینڈ میں جنگل کاقانون نافذ کیا گیا۔ روزانہ کی بنیاد پر مخصوص افراد جو کہ مختلف ویگن اسٹینڈ میں خوف اور دہشت کی علامت سمجھے جاتے ہیں ٹرانسپورٹرز اور ڈرائیورز سے بھتہ وصول کرکے قانون کو پاؤں تلے روندتے دکھائی دیتے ہیں۔
ویگن اسٹینڈ میں گھریلو یا پبلک ٹرانسپورٹ جو ویگن اسٹینڈمیں داخل ہو ان سے بھتہ وصول کیا جاتا ہے بھتہ نہ دینے والوں کے ساتھ گالی گلوچ اور سنگین نتائج کی دھمکیاں دی جاتی ہیں۔
ٹرانسپورٹرز اور ڈرائیورز نے ڈسٹرکٹ پولیس آفیسر اور ڈپٹی کمشنر سے مطالبہ کیاہے کہ دینہ جی ٹی روڈ پر قائم ویگن اسٹینڈ میں بھتہ وصولی کرنے والے غنڈوں کے خلاف فوجداری مقدمات درج کروائے جائیں تاکہ قانون کی حکمرانی قائم ہو سکے ۔
