جہلم: وزیراعلی پنجاب مریم نواز شریف کی گرین ٹریکٹر اسکیم کے تحت جہلم میں کسانوں میں جدید ٹریکٹر تقسیم کر دیے گئے۔
تفصیلات کے مطابق وزیراعلی پنجاب مریم نواز شریف کی خصوصی ہدایات پر گرین ٹریکٹر اسکیم کے تحت جہلم میں کسانوں کو جدید زرعی مشینری فراہم کرنے کا سلسلہ جاری ہے، جس کے تحت آج ضلع کونسل ہال جہلم میں ایک شاندار تقریب کا انعقاد کیا گیا۔ تقریب کے مہمان خصوصی وزیرِ مملکت برائے خزانہ و ریلوے بلال اظہر کیانی تھے، جنہوں نے تحصیل جہلم، دینہ اور سوہاوہ کے کسانوں میں ٹریکٹر تقسیم کیے۔
وزیر مملکت خزانہ و ریلوے بلال اظہر کیانی نے تحصیل جہلم، دینہ اور سوہاوہ کے 39 کسانوں میں ٹریکٹرز تقسیم کیے۔ ان میں سے 10 کسان جہلم، 10 دینہ اور 19 کسان سوہاوہ کے رہائشی ہیں۔ وزیراعلی پنجاب مریم نواز شریف کی خصوصی ہدایت کے تحت ہر ٹریکٹر پر 10 لاکھ روپے کی سبسڈی دی گئی ہے تاکہ کسان سستے داموں جدید زرعی مشینری حاصل کر سکیں۔
وزیر مملکت بلال اظہر کیانی نے اپنے خطاب میں کہا کہ وزیراعلی مریم نواز شریف کی کوششوں سے پنجاب میں زراعت جدید دور میں داخل ہو رہی ہے۔ انہوں نے کہا کہ ای میکنائزیشن کے عمل سے نہ صرف زرعی پیداوار میں اضافہ ہوگا بلکہ کسان معاشی طور پر مضبوط ہوں گے۔ انہوں نے اس بات پر بھی زور دیا کہ جدید مشینری جیسے سوپر سیڈرز، بیلرز اور کبوٹا مشینیں نہ صرف جدید کاشتکاری میں مددگار ہیں بلکہ گندم کی باقیات جلانے کے رحجان میں بھی کمی لائیں گی، جس سے سموگ پر قابو پانے میں مدد ملے گی۔
ڈپٹی کمشنر جہلم میر رضا اوزگن نے محکمہ زراعت کی کوششوں کو سراہتے ہوئے کہا کہ ضلع جہلم میں زراعت کی بہتری اور کسانوں کی سہولت ہماری اولین ترجیحات میں شامل ہیں۔ ڈپٹی ڈائریکٹر زراعت شاہد بخاری نے بتایا کہ اس اسکیم کے تحت 68 ٹریکٹر پہلے ہی تقسیم کیے جا چکے ہیں جبکہ آئندہ چند ماہ میں مزید 108 ٹریکٹر کسانوں میں تقسیم کیے جائیں گے۔
وزیر مملکت بلال اظہر کیانی نے میڈیا سے گفتگو کرتے ہوئے کہا کہ ستھرا پنجاب پروگرام، کسان کارڈ، للِہ تا جہلم روڈ کی تعمیر، ڈی ایچ کیو جہلم میں نیا بلاک، دینہ میں ٹی ایچ کیو کا قیام اور لاہور سیالکوٹ موٹر وے سے جہلم لنک روڈ جیسے منصوبے عوامی خدمت کا عملی ثبوت ہیں۔ انہوں نے کہا کہ وزیراعظم شہباز شریف نوجوانوں کے روزگار اور ملکی معاشی بہتری پر خصوصی توجہ دے رہے ہیں، جبکہ وہ اور وزیراعلی پنجاب مریم نواز عوام کی خدمت کے لیے ہمہ وقت کوشاں ہیں۔
انہوں نے مزید کہا کہ دینہ اور سوہاوہ میں گیس کی فراہمی کے دیرینہ مطالبات بھی جلد پورے کرنے کے لیے کوششیں جاری ہیں اور اس سلسلے میں وزیراعظم شہباز شریف اور وفاقی وزیر علی پرویز سے خصوصی درخواست بھی کی جائے گی۔
