دینہ: حضرت پیرا شاہ غازی المعروف دمڑیاں والی سرکار رحمۃ اللہ علیہ کا سالانہ عرس 24/25 فروری بروز ہفتہ اتوار حسب سابق روایت مذہبی جوش و جذبہ سے منعقد کیا جا رہا ہے۔
عرس پاک کی جملہ تقریبات سجادہ نشین دربارِ عالیہ کھڑی شریف صاحبزادہ میاں محمد عمر بخش کی سرپرستی میں پیرا شاہ ہاؤس کھڑی شریف میں منعقد کی جائیں گی۔ عرس کی تقریبات کو بطریق احسن سرانجام دینے کے لئے پیرا شاہ ہاؤس کھڑی شریف میں سجادہ نشین صاحبزادہ میاں محمد عمر بخش کی صدارت میں خدام و منتظمین کو طلب کر کے انتظامات کو حتمی شکل دے دی گئی۔
تفصیلات کے مطابق حضرت پیرا شاہ غازی المعروف دمڑیاں والی سرکار کے سالانہ عرس کی تقریبات کا باقاعدہ آغاز 24 فروری بروز ہفتہ بعد نمازِ عصر تلاوت قرآن پاک وختمات سے کیا جائے گا۔ بعداز نمازمغرب محفل ذکر و نعت ہوگی بعد ازاں مزار غازی قلندر پر غسل، چادر پوشی و گل پاشی کی تقریب منعقد ہو گی۔
بعداز نماز عشاء محفل وعظ و تبلیغ ہو گی۔ 25 فروری بروز اتوار بعد نماز ازفجر تلاوتِ قرآن مجید اور ختمات کی محفل منعقد ہوگی۔ دن 10 بجے تا نمازِ ظہر وعظ و تبلیغ کی محفل ہوگی۔ ظہر تا مغرب قافلوں کی آمد و استقبال اورسجادہ نشین صاحبزادہ میاں محمد عمر بخش سے زائرین کی ملاقات کا سلسلہ ہوگا۔
بعد نمازِاز مغرب پیرا شاہ ہاؤس پر عظیم الشان تاجدارِ ختم نبوت کانفرنس منعقد ہو گی جس میں ملک کے نامور علماء ومشائخ کی شرکت متوقع ہے۔ شب 10 بجے محفل سماع ہوگی اور بوقت فجر سجادہ نشین اختتامی دعا فرمائیں گے۔
