جہلم سمیت پنجاب کے تمام سرکاری محکمے اب سخت احتساب کے شکنجے میں ہیں۔ وزیر اعلیٰ پنجاب مریم نواز شریف نے صوبائی محکموں میں بدعنوانی، غفلت اور ناقص کارکردگی کے خلاف سخت کارروائیوں کے احکامات جاری کرتے ہوئے کڑی نگرانی کا نظام نافذ کرنے کا اعلان کیا ہے۔
وزیر اعلیٰ پنجاب کی ہدایت پر سرکاری محکموں کی اچانک جانچ پڑتال کے لیے خصوصی فورس تشکیل دی جا رہی ہے، جو چیف منسٹرز انسپکشن ٹیم (CMIT) کے ساتھ مل کر کام کرے گی۔
باوثوق ذرائع کے مطابق سی ایم آئی ٹی کی ٹیمیں جہلم سمیت صوبے بھر کے سرکاری محکموں میں خفیہ دورے کریں گی اور دفاتر میں اچانک چھاپے مار کر ریکارڈ، حاضری اور عوامی خدمات سے متعلق حکومتی ٹاسک پر عملدرآمد کا جائزہ لیں گی۔
نئے نظام کے تحت، الیکشن ٹیموں کے ہمراہ پولیس فورس بھی تعینات کی جائے گی تاکہ کارروائیاں موثر انداز میں انجام دی جا سکیں۔ سی ایم آئی ٹی کی ٹیمیں فورس اور ضلعی انتظامیہ کی کارکردگی کا بھی معائنہ کریں گی اور ہر دورے کے بعد انسپکشن رپورٹس اسی روز وزیر اعلیٰ کے دفتر کو ارسال کی جائیں گی۔
ذرائع کا کہنا ہے کہ اس اقدام کا مقصد سرکاری محکموں میں شفافیت کو یقینی بنانا، عوامی خدمات کی فراہمی میں بہتری لانا اور بدعنوان عناصر کے خلاف فوری کارروائی کرنا ہے، تاکہ پنجاب بھر میں سرکاری محکمے موثر، جوابدہ اور عوام دوست بن سکیں۔
