جہلم: وزیر اعلیٰ پنجاب نہ آئیں، صوبائی وزیر صحت نے مشیر صحت پنجاب اور سیکرٹری صحت و آبادی کے ہمراہ جہلم میں پہلی جدید کارڈیک کیتھ لیب کا افتتاح کر دیا۔
تفصیلات کے مطابق جہلم میں صحت کے شعبے میں ایک اہم سنگِ میل عبور کر لیا گیا ہے۔ ڈسٹرکٹ ہیڈ کوارٹر ہسپتال جہلم میں پہلی جدید کارڈیک کیتھرائزیشن لیبارٹری (کیتھ لیب) کا باقاعدہ افتتاح صوبائی وزیرِ پرائمری اینڈ سیکنڈری ہیلتھ پنجاب خواجہ عمران نذیر نے مشیرِ صحت پنجاب میجر جنرل (ر) ڈاکٹر اظہر کیانی اور سیکرٹری صحت و آبادی نادیہ ثاقب کے ہمراہ کیا۔ اس افتتاح کے ساتھ ہی ضلع کی سطح پر دل کے علاج کی جدید سہولیات باضابطہ طور پر دستیاب ہو گئی ہیں۔
ذرائع کے مطابق وزیرِ اعلیٰ پنجاب مریم نواز کا مجوزہ دورہ جہلم مصروفیات یا انتظامی وجوہات کی بنا پر ایک بار پھر ملتوی کر دیا گیا، تاہم تقریب اپنا طے شدہ شیڈول برقرار رکھتے ہوئے منعقد کی گئی۔ افتتاحی تقریب میں ممبر قومی اسمبلی چوہدری فرخ الطاف، مسلم لیگ (ن) کے رہنماؤں ، ڈپٹی کمشنر جہلم میر رضا اوزگن، ڈی پی او طارق عزیز سندھو، ضلعی انتظامیہ کے افسران، طبی عملہ اور سماجی شخصیات نے شرکت کی۔
اس موقع پر گفتگو کرتے ہوئے صوبائی وزیر خواجہ عمران نذیر کا کہنا تھا کہ حکومت کے انقلابی پروگرام کے تحت پنجاب کے 16 اضلاع میں مرحلہ وار کیتھ لیبز قائم کی جا رہی ہیں، تاکہ مریضوں کو علاج کے لیے بڑے شہروں کا رخ نہ کرنا پڑے۔
انہوں نے کہا کہ جہلم میں کیتھ لیب کے آغاز سے دل کے مریضوں کو اب اپنے ہی شہر میں اینجیوگرافی، اینجیو پلاسٹی، پرائمری پی سی آئی اور عارضی پیس میکر سمیت دیگر اہم طبی سہولیات دستیاب ہوں گی، جس سے ہنگامی صورتِ حال میں قیمتی انسانی جانیں بچانے میں مدد ملے گی۔
مشیرِ صحت ڈاکٹر اظہر کیانی نے بریفنگ دیتے ہوئے بتایا کہ جدید مشینری اور تربیت یافتہ ماہر ڈاکٹروں و پیرا میڈیکل اسٹاف کی موجودگی سے علاج کے معیار میں نمایاں بہتری آئے گی اور مریضوں کے وقت اور اخراجات دونوں کی بچت ہوگی۔
دوسری جانب تقریب میں متعدد سابق اراکینِ اسمبلی اور مقامی لیگی عہدیداران کی عدم شرکت نے سیاسی حلقوں میں چہ مگوئیوں کو جنم دیا ہے، اور اختلافات میں اضافے کی بازگشت بھی سنائی دے رہی ہے۔تاہم انتظامیہ اور صحت حکام کے مطابق توجہ اس اہم عوامی فلاحی منصوبے کی کامیاب تکمیل اور شہریوں کو بہتر علاج کی فراہمی پر مرکوز ہے۔
