جہلم میں نامعلوم افراد کی فائرنگ سے پولیس اہلکار زخمی ہو گیا، زخمی پولیس اہلکار کو اسپتال منتقل کر دیا گیا۔
تفصیلات کے مطابق یہ افسوسناک واقعہ جہلم کے علاقے نورپور گاؤں میں پیش آیا جہاں نامعلوم افراد کی فائرنگ سے پولیس اہلکار رضوان زخمی ہو گیا، جسے فوری طور پر طبی امداد کے لیے ڈسٹرکٹ ہیڈ کوارٹر اسپتال جہلم منتقل کر دیا گیا۔
پولیس ذرائع کے مطابق پولیس اہلکار رضوان پر نامعلوم ملزمان نے ویگو ڈالہ سے فائرنگ کی۔ زخمی اہلکار تھانہ چوٹالہ میں تعینات ہے۔ فائرنگ کے بعد ملزمان موقع سے فرار ہو گئے۔
واقعے کے فوراً بعد پنجاب پولیس نے علاقے میں ناکہ بندی کر دی اور ملزمان کی گرفتاری کے لیے سرچ آپریشن شروع کر دیا گیا ہے۔ پولیس حکام کا کہنا ہے کہ واقعے کی مختلف پہلوؤں سے تفتیش جاری ہے اور ملزمان کو جلد گرفتار کر لیا جائے گا۔
