پنڈدادنخان: جلالپور شریف کے قریب میں وائلڈ لائف اہلکار کی مبینہ فائرنگ سے 22 سالہ نوجوان جاں بحق ہو گیا۔
تفصیلات کے مطابق جہلم کی تحصیل پنڈدادنخان کے علاقے جلالپور شریف کے قریب فائرنگ کے ایک افسوسناک واقعہ میں 22 سالہ نوجوان جاں بحق ہو گیا۔ مقتول کی شناخت محمد کلیم کے نام سے ہوئی ہے، جو اپنی ہمشیرہ کے گھر آیا ہوا تھا۔
ابتدائی اطلاعات کے مطابق فائرنگ مبینہ طور پر وائلڈ لائف ڈیپارٹمنٹ کے ایک اہلکار کی جانب سے کی گئی، جس کے نتیجے میں نوجوان موقع پر ہی دم توڑ گیا۔ واقعہ کی خبر پھیلتے ہی علاقے میں شدید اشتعال پھیل گیا اور مقامی افراد سراپا احتجاج بن گئے۔
اطلاع ملنے پر پولیس کی بھاری نفری موقع پر پہنچ گئی اور علاقے کو گھیرے میں لے کر حالات کو قابو میں کیا۔ پولیس نے لاش کو تحویل میں لے کر پوسٹ مارٹم کے لیے ہسپتال منتقل کر دیا جبکہ واقعہ کی وجوہات جاننے کے لیے شواہد اکٹھے کیے جا رہے ہیں۔
پولیس حکام کے مطابق واقعہ کی مکمل تحقیقات جاری ہیں اور حقائق سامنے آنے کے بعد قانونی کارروائی عمل میں لائی جائے گی۔ دوسری جانب مقتول کے لواحقین اور اہلِ علاقہ نے واقعہ کی شفاف تحقیقات اور ذمہ داران کے خلاف سخت کارروائی کا مطالبہ کیا ہے۔
