الفلاح فاؤنڈیشن پاکستان کے زیرِ اہتمام ایک روزہ فری میڈیکل کیمپ کا انعقاد گورنمنٹ پرائمری سکول ڈھوک پرڑے والا داخلی تھوہا محرم خان میں کیا گیا، جو صبح 9 بجے سے دن 2 بجے تک جاری رہا۔
کیمپ میں علاقے کے سینکڑوں ضرورت مند اور سفید پوش مریضوں نے مفت طبی سہولیات اور ادویات سے استفادہ کیا۔ الفلاح فاؤنڈیشن پاکستان، سلسلہ نقشبندیہ اویسیہ کی ذیلی تنظیم ہے اور اپنی تمام فلاحی و طبی خدمات شیخ امیر عبدالقدیر اعوان کی زیرِ نگرانی سرانجام دے رہی ہے۔
فری میڈیکل کیمپ میں ماہر ڈاکٹرز کی ٹیم نے خدمات انجام دیں، جن میں چائلڈ اسپیشلسٹ، سکن اسپیشلسٹ، لیڈی ڈاکٹر (ماہر امراضِ نسواں)، ماہر امراضِ نوزائیدگان، آئی اسپیشلسٹ، الٹراساؤنڈ اسپیشلسٹ، ماہر امراضِ شوگر و بلڈ پریشر، میڈیکل اسپیشلسٹ، ماہر ناک کان گلا اور ڈینٹل سرجن شامل تھے۔ مریضوں کا تفصیلی معائنہ کیا گیا اور مفت ادویات فراہم کی گئیں۔
اس موقع پر صاحب مجاز محمد ارشد نے کیمپ کا دورہ کیا اور انتظامات پر اطمینان کا اظہار کیا۔ انہوں نے کہا کہ ایسے فری میڈیکل کیمپس نہ صرف مستحق افراد بلکہ سفید پوش طبقے کے لیے بھی بڑی سہولت ہیں، جو مہنگے علاج کے اخراجات برداشت نہیں کر پاتے۔
کیمپ میں معززین علاقہ، سیاسی، سماجی و مذہبی شخصیات کے علاوہ صحافیوں کی بڑی تعداد نے بھی شرکت کی۔ مریضوں اور اہلِ علاقہ نے الفلاح فاؤنڈیشن پاکستان کا شکریہ ادا کیا اور سلسلہ نقشبندیہ اویسیہ کے بزرگوں کو دعاؤں سے نوازا۔
الفلاح فاؤنڈیشن کے ذمہ داران نے اس عزم کا اظہار کیا کہ حضرت امیر محمد اکرم اعوان کی رکھی ہوئی بنیاد اور شیخ سلسلہ نقشبندیہ اویسیہ کی سرپرستی میں پاکستان بھر میں بلا تفریق مذہب و سیاست اسی طرح کے مزید فری میڈیکل کیمپس کا انعقاد آئندہ بھی جاری رکھا جائے گا تاکہ عوام کو صحت کی سہولیات ان کی دہلیز پر فراہم کی جا سکیں۔
