کوٹلی آزاد کشمیر میں الفلاح فاؤنڈیشن پاکستان کے زیرِ اہتمام ایک فری میڈیکل کیمپ کا انعقاد کیا گیا، جس سے بڑی تعداد میں مستحق اور سفید پوش مریضوں نے استفادہ کیا۔
یہ میڈیکل کیمپ بروز اتوار یکم فروری صبح 10 بجے سے دوپہر 1 بجے تک گورنمنٹ بوائز انٹر کالج گوئی کوٹلی میں جاری رہا۔
الفلاح فاؤنڈیشن پاکستان سلسلہ نقشبندیہ اویسیہ کی ذیلی تنظیم ہے اور اپنی تمام فلاحی خدمات شیخ سلسلہ نقشبندیہ اویسیہ امیر عبدالقدیر اعوان کی زیرِ نگرانی سرانجام دے رہی ہے۔ میڈیکل کیمپ میں چائلڈ اسپیشلسٹ اور اسکن اسپیشلسٹ ڈاکٹرز کی ٹیم نے مریضوں کا معائنہ کیا اور انہیں مفت ادویات فراہم کی گئیں۔
کیمپ میں شریک مریضوں کا کہنا تھا کہ یہ سہولت نہ صرف غریب اور نادار طبقے کے لیے انتہائی مفید ہے بلکہ سفید پوش افراد کے لیے بھی بڑی نعمت ثابت ہو رہی ہے۔ اس موقع پر صاحبِ مجاز لطیف بٹ اویسی نے کیمپ کا دورہ کیا اور انتظامات پر اطمینان کا اظہار کیا۔
منتظمین کے مطابق الفلاح فاؤنڈیشن پاکستان پورے ملک میں بلا امتیاز سیاسی و مذہبی تفریق کے اپنی فلاحی خدمات انجام دے رہی ہے۔ اس فلاحی ادارے کی بنیاد امیر محمد اکرم اعوان نے رکھی، جبکہ اس کی سرپرستی شیخ سلسلہ نقشبندیہ اویسیہ امیر عبدالقدیر اعوان کر رہے ہیں۔
میڈیکل کیمپ میں علاج معالجہ کروانے والے مریضوں نے الفلاح فاؤنڈیشن کا شکریہ ادا کیا اور شیخ سلسلہ نقشبندیہ اویسیہ کو دعاؤں سے نوازا۔
اس موقع پر الفلاح فاؤنڈیشن کے ذمہ داران نے اس عزم کا اظہار کیا کہ وہ مستقبل میں بھی امیر عبدالقدیر اعوان کی نگرانی میں اسی طرح کے مزید فری میڈیکل کیمپس کا انعقاد کرتے رہیں گے تاکہ زیادہ سے زیادہ انسانیت کی خدمت کی جا سکے۔
