جہلم پولیس نے پیشہ ور بھکاریوں کے خلاف اہم کارروائی کرتے ہوئے تین خواتین کو گرفتار کر لیا۔
تفصیلات کے مطابق جہلم میں ایس ایچ او تھانہ سٹی اور ان کی ٹیم نے کارروائی کرتے ہوئے پیشہ ور بھکاری خواتین کو حراست میں لیا، جن کے خلاف الگ الگ مقدمات درج کر کے قانونی کارروائی کا آغاز کر دیا گیا ہے۔
پولیس کے مطابق یہ پیشہ ور بھکاری مختلف شاہراہوں اور چوک چوراہوں پر کھڑے ہو کر نہ صرف ٹریفک کی روانی میں خلل ڈالتی تھیں بلکہ حادثات کا باعث بھی بن سکتی تھیں، جس سے شہریوں کی جان و مال کو خطرات لاحق رہتے ہیں۔
اس حوالے سے ڈسٹرکٹ پولیس آفیسر جہلم طارق عزیز سندھو نے کہا ہے کہ پیشہ ور بھکاری معاشرتی بگاڑ اور عوامی تحفظ کے لیے خطرہ بن سکتے ہیں، اس لیے ان کے خلاف بلا امتیاز کارروائیاں جاری رکھی جائیں گی۔
انہوں نے شہریوں سے بھی اپیل کی کہ وہ پیشہ ور بھکاریوں کی حوصلہ شکنی کریں اور ایسے عناصر کو پیسے دینے سے گریز کریں، تاکہ اس مسئلے کا مستقل حل ممکن ہو سکے۔
