پنڈدادنخان: مرکزی انجمن تاجران پنڈدادنخان کے وفد نے صدر انجمن تاجران چوہدری زبیر جمیل کی سربراہی میں اسسٹنٹ کمشنر پنڈدادنخان عائشہ شفقت سے ملاقات کی اور انہیں نیا چارج سنبھالنے پر خوش آمدید کہا۔
وفد نے اس موقع پر شہر کے تاجروں کو درپیش مسائل سے آگاہ کیا۔ سرپرست اعلیٰ چوہدری سلیم باگڑی اور صدر چوہدری زبیر جمیل نے بلدیہ کی ملکیت دکانوں کے معاملات پر تفصیلی بریفنگ دیتے ہوئے کہا کہ شہر میں معاشی بدحالی بڑھ رہی ہے اور کاروباری سرگرمیاں متاثر ہو رہی ہیں۔
انہوں نے بتایا کہ ایسے حالات میں میونسپل کی ملکیت دکانوں کے کرایوں میں کئی گنا اضافہ تاجروں کے لیے مشکلات کا باعث بن رہا ہے اور تاجر فاقہ کشی تک مجبور ہو سکتے ہیں۔ وفد نے مطالبہ کیا کہ موجودہ معاشی صورتحال کو مدنظر رکھتے ہوئے کرایوں میں اضافے کے فیصلے پر نظر ثانی کی جائے اور تاجروں کو ریلیف فراہم کیا جائے۔
اسسٹنٹ کمشنر پنڈدادنخان عائشہ شفقت نے وفد کو مسائل کے حل اور ہر ممکن ریلیف فراہم کرنے کی یقین دہانی کرواتے ہوئے کہا کہ تاجروں کے جائز مطالبات کو ترجیحی بنیادوں پر حل کیا جائے گا۔
