دینہ: جہلم کی عدالت نے منشیات فروشی کے مقدمے کا فیصلہ سناتے ہوئے مجرم جمعہ گل کو جرم ثابت ہونے پر 10 سال قید اور ایک لاکھ 25 ہزار روپے جرمانے کی سزا سنا دی۔
ترجمان جہلم پولیس کے مطابق معزز عدالت نے تھانہ دینہ میں درج مقدمہ نمبر 765/25 بجرم CNSA 9(1)6C کا فیصلہ سنایا۔ مقدمے کے مطابق مجرم جمعہ گل نے سال 2025 میں منشیات فروشی کے جرم کا ارتکاب کیا تھا۔
پولیس کے مطابق ملزم کو ٹریس کر کے گرفتار کیا گیا اور مکمل تفتیش کے بعد ٹھوس شواہد کے ساتھ چالان عدالت پیش کیا گیا۔ مقدمے کی مؤثر پیروی کے نتیجے میں عدالت نے جرم ثابت ہونے پر ملزم کو قرار واقعی سزا سنائی۔
ڈسٹرکٹ پولیس آفیسر جہلم شفیق احمد چوہدری نے کہا کہ منشیات فروش معاشرے کا ناسور ہیں اور ان کے خلاف بھرپور کریک ڈاؤن جاری ہے۔ انہوں نے عزم کا اظہار کیا کہ نوجوان نسل کو منشیات کی لعنت سے محفوظ رکھنے کے لیے قانون نافذ کرنے والے ادارے بلاامتیاز کارروائیاں جاری رکھیں گے۔
