جہلم پولیس نے 10 سالہ بچے سے مبینہ جنسی زیادتی کے واقعے پر فوری کارروائی کرتے ہوئے دو ملزمان کو گرفتار کر لیا۔
ترجمان جہلم پولیس کے مطابق واقعے کی اطلاع ملتے ہی ایس ایچ او تھانہ صدر اور ان کی ٹیم نے فوری کارروائی کرتے ہوئے مقدمہ درج کیا اور جدید تفتیشی حکمتِ عملی اختیار کرتے ہوئے دونوں نامزد ملزمان کو گرفتار کر لیا۔
پولیس کا کہنا ہے کہ مقدمے کی تفتیش شفاف انداز میں جاری ہے اور تمام شواہد مکمل کرنے کے بعد ملزمان کا چالان عدالت میں پیش کیا جائے گا تاکہ قانون کے مطابق کارروائی عمل میں لائی جا سکے۔
ڈی پی او جہلم شفیق احمد چوہدری نے کہا کہ خواتین اور بچوں کے خلاف جنسی جرائم انتہائی سنگین نوعیت کے ہیں اور ڈسٹرکٹ پولیس جہلم ایسے مقدمات میں زیرو ٹالرنس پالیسی پر عمل پیرا ہے۔ انہوں نے کہا کہ اس نوعیت کے جرائم میں ملوث افراد کے ساتھ کسی قسم کی رعایت نہیں برتی جائے گی اور انہیں قانون کے مطابق سزا دلوانے کے لیے تمام قانونی تقاضے پورے کیے جائیں گے۔
انہوں نے مزید کہا کہ بچوں اور خواتین کے تحفظ کو یقینی بنانا جہلم پولیس کی اولین ترجیحات میں شامل ہے، جبکہ ایسے واقعات کی فوری رپورٹنگ اور موثر تفتیش کے ذریعے متاثرہ افراد کو انصاف فراہم کرنے کے لیے ہر ممکن اقدامات کیے جا رہے ہیں۔
