جہلم میں ارسل ٹاؤن کے گراؤنڈ سے نومولود بچی زندہ حالت میں برآمد، پولیس کی تحقیقات شروع کر دیں۔
تفصیلات کے مطابق جہلم میں ارسل ٹاؤن کے گراؤنڈ سے نومولود بچی زندہ حالت میں ملنے کے واقعے نے علاقے میں تشویش اور افسوس کی لہر دوڑا دی۔ اطلاع ملتے ہی ریسکیو 1122 اور پولیس کی ٹیمیں موقع پر پہنچ گئیں اور نومولود بچی کو اپنی تحویل میں لے کر فوری طور پر اسپتال منتقل کر دیا۔
ذرائع کے مطابق ایک خاتون اور مرد موٹر سائیکل پر سوار ہو کر گراؤنڈ میں آئے، جہاں مبینہ طور پر نومولود بچی کو چھوڑنے کے بعد دونوں موٹر سائیکل پر فرار ہو گئے۔ واقعے کی اطلاع ملنے پر ریسکیو 1122 اور پولیس اہلکاروں نے فوری کارروائی کرتے ہوئے بچی کو بحفاظت اسپتال منتقل کیا۔
اسپتال ذرائع کے مطابق نومولود بچی کی حالت مستحکم اور نارمل ہے، جسے طبی نگہداشت کے لیے نرسری منتقل کر دیا گیا ہے، جہاں ڈاکٹرز اور طبی عملہ اس کی دیکھ بھال کر رہا ہے۔
دوسری جانب نومولود بچی کے گراؤنڈ سے ملنے کی خبر پھیلتے ہی اولاد کے خواہش مند متعدد افراد اسپتال پہنچ گئے اور بچی کی کفالت یا اسے گود لینے کے حوالے سے رابطہ کرنے لگے۔
پولیس نے واقعے کی تحقیقات شروع کر دی ہیں۔ پولیس ذرائع کے مطابق گراؤنڈ میں بچی کو چھوڑ کر فرار ہونے والے مرد اور خاتون کی شناخت اور تلاش کے لیے مختلف پہلوؤں سے تحقیقات کی جا رہی ہیں۔
