سوہاوہ کے نواحی علاقے میں 57 سالہ شخص منی ڈیم میں ڈوب کر جاں بحق ہو گیا۔
تفصیلات کے مطابق جہلم کی تحصیل سوہاوہ کے علاقے گیگی سیداں کے قریب منی ڈیم میں ڈوبنے سے 57 سالہ شخص جاں بحق ہوگیا۔
ریسکیو 1122 کے مطابق منی ڈیم میں ایک شخص کے ڈوبنے کی اطلاع ملتے ہی ایک ایمبولینس اور واٹر ریسکیو وین جائے وقوعہ پر روانہ کی گئی۔ ریسکیو ٹیم نے موقع پر پہنچتے ہی واٹر ریسکیو سرچ آپریشن شروع کردیا۔ ریسکیو حکام کے مطابق منی ڈیم کی لمبائی تقریباً 500 میٹر، چوڑائی 100 میٹر اور گہرائی 10 سے 15 فٹ ہے۔
شدید اندھیرے کے باعث مسلسل سرچ آپریشن کے بعد رات گئے آپریشن عارضی طور پر روک دیا گیا، جبکہ موقع پر رات کے قیام اور نگرانی کے لیے انسیڈنٹ کمانڈ پوسٹ قائم کردی گئی۔
صبح سورج طلوع ہوتے ہی واٹر ریسکیو سرچ آپریشن دوبارہ شروع کیا گیا۔ ریسکیو ٹیم کی مسلسل کوششوں کے بعد ڈوبنے والے شخص کی لاش تلاش کرلی گئی، جسے تحصیل ہیڈکوارٹر ہسپتال سوہاوہ منتقل کردیا گیا۔
ریسکیو 1122 کے مطابق جاں بحق ہونے والے شخص کی شناخت قدوس احمد ولد محمد شبیر کے نام سے ہوئی ہے۔
