جہلم پریس کلب کے تمام دھڑے ایک پلیٹ فارم پر متحد ہو گئے، جہاں فل ہاؤس اجلاس میں سینئر صحافیوں کی باہمی مشاورت اور اتفاقِ رائے سے ڈاکٹر سہیل امتیاز خان کو صدر، مرزا قدیر بیگ کو جنرل سیکرٹری جبکہ راجہ نوبہار خان کو بھاری اکثریت سے چیئرمین منتخب کر لیا گیا۔
سابق صدر مہر محمد الیاس کی جانب سے پریس کلب کے وسیع تر مفادات اور صحافتی اتحاد کو مضبوط بنانے کے لیے اپنی ایگزیکٹو باڈی اور پریس کلب کی ذیلی تنظیموں کو تحلیل کرنے کے اعلان کے بعد نئی قیادت کا انتخاب عمل میں لایا گیا۔ اجلاس میں مختلف دھڑوں اور گروپوں کے درمیان اتفاقِ رائے کو صحافتی یکجہتی اور ادارہ جاتی استحکام کی جانب اہم پیش رفت قرار دیا گیا۔
رپورٹ کے مطابق جہلم پریس کلب کا فل ہاؤس اجلاس سابق صدر مہر محمد الیاس کی صدارت میں منعقد ہوا، جبکہ جنرل سیکرٹری کے فرائض چوہدری تصور حسین نے انجام دیے۔ اجلاس کا آغاز مرزا قدیر بیگ نے تلاوتِ کلامِ پاک سے کیا، جبکہ سید ناصر محمود نے بارگاہِ رسالت مآب ﷺ میں ہدیہ نعت پیش کیا۔
اجلاس سے خطاب کرتے ہوئے سابق صدر مہر محمد الیاس نے اپنی ایگزیکٹو باڈی اور پریس کلب کے تمام ممبران کا تہہ دل سے شکریہ ادا کیا۔ انہوں نے کہا کہ ان کے دور صدارت میں تمام ساتھیوں نے بھرپور تعاون کیا اور انہیں عزت و احترام سے نوازا، جس پر وہ اپنے تمام ساتھیوں کے شکر گزار ہیں۔
مہر محمد الیاس نے کہا کہ پریس کلب جیسے صحافتی اداروں میں گروہ بندی کے بجائے اتحاد، اتفاق، باہمی احترام اور مشاورت کو فروغ دینا وقت کی اہم ضرورت ہے۔ اسی سوچ کے تحت انہوں نے اپنی ایگزیکٹو باڈی اور پریس کلب کی ذیلی تنظیموں کو تحلیل کرنے کا فیصلہ کیا، تاکہ تمام صحافیوں کو ایک پلیٹ فارم پر متحد کرکے ادارے کو مزید مضبوط بنایا جا سکے۔
انہوں نے مزید کہا کہ جہلم پریس کلب کے سینئر صحافیوں محمد امجد بٹ، چوہدری عابد محمود اور سید مستفیض اقبال بخاری جو بھی فیصلہ کریں گے، وہ اسے من و عن تسلیم کریں گے۔ ان کے اس اعلان کے بعد سینئر صحافیوں نے باہمی مشاورت کے ذریعے نئی قیادت کے ناموں پر اتفاق کیا اور نومنتخب عہدیداران کا اعلان کر دیا۔
اجلاس میں اعلان کردہ نئی کابینہ کے مطابق محمد امجد بٹ کو سرپرستِ اعلیٰ، مہر محمد الیاس کو سرپرست، ڈاکٹر سہیل امتیاز خان کو صدر، راجہ نوبہار خان کو چیئرمین، چوہدری ظفر نور کو سینئر نائب صدر، غلام قادر مخلص کو نائب صدر، مرزا قدیر بیگ کو جنرل سیکرٹری، نجف شہزاد کو جوائنٹ سیکرٹری، راجہ سہیل کیانی کو فنانس سیکرٹری، سید ناصر محمود کو سیکرٹری اطلاعات اور عبدالغفار آزاد کو آفس سیکرٹری منتخب کیا گیا۔
اجلاس میں نئی قیادت کے انتخاب کو جہلم پریس کلب میں باہمی ہم آہنگی، اتحاد اور ادارہ جاتی استحکام کے لیے اہم پیش رفت قرار دیا گیا۔ شرکاء نے اس امر پر اتفاق کیا کہ صحافتی اداروں کی مضبوطی کے لیے باہمی مشاورت، تحمل، احترام اور مشترکہ جدوجہد کو بنیادی اہمیت حاصل ہے۔
اس موقع پر اس عزم کا اظہار کیا گیا کہ نومنتخب عہدیداران اور پریس کلب کے تمام ممبران باہمی تعاون اور پیشہ ورانہ ذمہ داریوں کو مقدم رکھتے ہوئے صحافیوں کے حقوق کے تحفظ، صحافتی اقدار کے فروغ اور جہلم پریس کلب کی ترقی و بہتری کے لیے اپنا کردار ادا کریں گے۔
اجلاس میں تمام دھڑوں کے درمیان اتفاق رائے سے نئی قیادت کے انتخاب کو صحافتی اتحاد کی جانب ایک مثبت قدم قرار دیتے ہوئے امید ظاہر کی گئی کہ اس فیصلے سے پریس کلب کے معاملات کو مزید مؤثر انداز میں چلانے اور صحافی برادری کو ایک مضبوط پلیٹ فارم پر متحد رکھنے میں مدد ملے گی۔
