جہلم: محرم الحرام کے دوران امن و امان کے قیام اور کسی بھی ہنگامی صورتحال سے نمٹنے کے لیے جہلم پولیس کی جانب سے موک ایکسرسائز کا انعقاد کیا گیا۔
یہ مشق ڈی پی او جہلم طارق عزیز سندھو کی زیر نگرانی سٹی سرکل کی مختلف امام بارگاہوں میں کی گئی۔ موک ایکسرسائز کا مقصد محرم الحرام کے دوران جلوسوں اور مجالس میں کسی بھی ممکنہ ہنگامی صورت حال میں پولیس اور دیگر اداروں کی تیاری کا عملاً جائزہ لینا تھا تاکہ سیکیورٹی امور میں کوئی کمی نہ رہ جائے۔
اس مشق میں ایلیٹ فورس، ریسکیو 1122، سول ڈیفنس، محکمہ صحت اور دیگر متعلقہ اداروں نے مشترکہ طور پر حصہ لیا۔ مشق کے دوران سرچ اینڈ کلیئرنس آپریشن، فوری رسپانس، مشکوک افراد کی شناخت اور گرفتاری، زخمیوں کی بروقت منتقلی اور عوامی تحفظ سے متعلق مختلف مراحل کا عملی مظاہرہ کیا گیا۔
ڈی پی او طارق عزیز سندھو نے اس موقع پر کہا کہ محرم الحرام میں شہریوں کا تحفظ اور امن و امان کا قیام ہماری اولین ترجیح ہے۔ انہوں نے مزید کہا کہ تمام اداروں کے باہمی اشتراک سے ہر ممکن کوشش کی جائے گی کہ مجالس اور جلوسوں کا انعقاد پرامن ماحول میں ہو اور عوام کو مکمل تحفظ فراہم کیا جائے۔
پولیس اور دیگر سیکیورٹی اداروں کی اس پیشگی مشق کو شہریوں اور علمائے کرام کی جانب سے سراہا گیا، اور امید ظاہر کی گئی کہ محرم الحرام کے دوران بھی انتظامیہ اسی جذبے سے ذمہ داریاں سرانجام دے گی۔
